Industri bumai betupi ‘injin duit’ orang menua pesisir

0

Penumbuh Kunsil Pemansang Bumai Betupi sitak Parlimen diadang ulih nulung nyungkakka pengawa bumai betupi di menua tu, pia ku Ahmad

KUALA LUMPUR: Enggau puku ke semina RM50 aja, Ahmad Termizi Dollah Kusni, 50, ari Kampung Bukit Bangkong, Sepang ulih nyadi jutawan kerepek ubi.

Amat ga iya udah tiga kali enda mujur, tang udah nya iya bisi endar jalai ngangkatka mua diri asil ari pengeliat ati enggau pengarap iya ke pengawa bekebun nyadi siti pengawa bisnis.

Ku Ahmad Termizi, iya belabuh buya pengawa bejual kerepek ubi ba taun 1986 enggau puku RM50 enggau siti kali. Kali nya mega dinjau iya ari orang bukai kena nguring ubi.

“Aku udah tiga kali enda mujur dalam pengawa tu, datai ke aku enda nemu bekuingka diri agi lalu nyadi driba luri,” ku madah ngagai Bernama maya berandau ba kilang Jamirah Food Industries (M) Sdn Bhd di Jalan Mempelam, Kampung Bukit Bangkong, Sepang, Selangor.

Pengidup iya bebali udah numbuhka Jamirah Food Industries (M) Sdn Bhd ba taun 1986.

Ahmad Termizi ke nyadi ketuai besai kompeni nya madah, sari tu iya bisi pampang kompeni baka Jamirah Enterprise, JFI Marketing Sdn Bhd enggau Gemba Marketing Sdn Bhd.

Kompeni iya bulih setipikit Amalan Baik Ladang ari Opis Betanam Betupi ba taun 2004 ke lalu muka rambal baru terus ngemansangka industri ubi kayu.

“Udah 20 taun aku gawa penapat inat, ujung iya aku ulih rembus ba makit menua luar lalu sari tu nyauka 20 persin ari pemansut kilang aku baka kerepek ubi dijual di menua luar baka United Kingdom, Australia, Dubai enggau Vietnam,” ku iya.

Kediatu kilang iya ke bisi 20 iku orang gawa tetap dia, ulih mansutka 3 tan kerepek ubi sari. Ku iya, kerepek ubi iya ke dijual enggau nama Agro Chips kediatu, laku bulih RM5 juta setaun ke nyengkaum 80 persin dijual dalam menua tu lalu kelebih nya asil ari eksport ke menua luar.

Siku agi orang bisnis nupi kambin komersial, Mahathir Talib, 35, ari Kampung Ulu Melaka, Alor gajah di Melaka madahka pengawa betanam betupi ulih meri penguntung enti pandai ngena peluang ke diberi perintah.

Ku iya, potensi betupi jelu amat besai untung lalu agi bisi mayuh jalai dikena ngemansangka pengawa nya.

“Nya meh meda potensi nya suba aku lalu netapka ati diri numbuhka kompeni MP Livestock di Kampung Ulu Melaka Pindah nupi kambin, kambin biri-biri enggau engkerebau,” ku iya maya berandau ba kebun iya.

Ku iya, ketungkah iya suba, iya semina bisi 60 iku purih kambin indu enggau lima iku kambin lelaki ari purih kambin  Jamnapari, Boer, Rubian, kampung (katjang), Sanean enggau bebiri Barbados, Lonte sereta Malin.

Ku Mahathir, diatu kambin iya bisi 400 iku lalu kompeni iya ulih nyual 800 kg dagin kambin baru tiap minggu.

“Rega kambin diatu manah amat lalu aku ulih nyual kira RM450 ngagai RM1,800 siku bepanggai enggau pemerat sereta purih kambin,” ku iya.

Iya diatu bisi kandang 93 meter pemanjai x 10 meter pemesai di Kampung Ulu Melaka Pindah.

Nyadi Othman Abu Hassan, 50, ari Kampung Panchor, Durian Tunggal Melaka, madahka taja pan pengawa betupi jelu tu sebengkah kereja ke umbas iya pengiruh, tang iya enda kala mantul laban nemu pengawa tu ulih nyadi pemansut belanja enti dintu enggau jalai ke betul.

Belabuh ba pun taun 2004 enggau puku RM1,000, Othman meli empat iku kambin menua lalu ba tengan taun, iya meli 15 iku da agi kambin menua ke bulih RM3,000.

Setaun udah nya, iya meli chapi. Belabuh enggau empat iku chapi enggau mudal RM3,200, iya lalu nambahka penyampau chapi iya ngagai 51 iku enggau mudal RM75,000.

Ku Othman, penanggul besai pengawa nupi jelu tu kediatu baka penyakit lalu maya iya ninggang besai amat rugi kelbih agi enti jelu tupi mayuh mati.

“Angka kediatu engku bisi 140 iku chapi, kambin 170 iku,” ku iya.

Kena nengkani jelu tupi, iya meri seku ke dichampur enggau daun kelapa sawit, rumput, gula mirah enggau batang mulung, ku iya.

Ba berita bukai, Sapit Menteri Betanam Betupi enggau Industri Asas Tani Datuk Rohani Karim madah, ba 2008 Malaysia enda alah enda meli 103 ribu tan dagin chapi ke bulih RM883.9 juta lalu dagin kambin bisi 18 ribu tan ke bulih RM188 juta. — Bernama