PULAU PINANG: servis e-tanah iya nya servis ti bekenaka chara online enggau Opis Tanah Enggau Asil deka dikerembaika di seluruh menua tu enda lama da agi.Menteri Pengeraja Asal enggau Rampa Menua Datuk Seri Douglas Uggah Embas madah, servis nya kala dipejalaika di menua Pulau Pinang ti nyadika projek perintis mujur nerima sambut ke manah ari rayat.
“Sepengudah Pulau Pinang, ke diatu e-tanah mega dipejalaika di Melaka enggau Negeri Sembialn lalu udah nya deka dikerembai ngagai seleruh negeri di menua tu enggau chara sereta atur ke berenggat-rengat,” ku iya lebuh bejaku ngagai bala pengarang berita ditu kemari.
Servis e-tanah tu mantu mensia mayuh bebayar ngena chara online sereta nyalin resit bayar kelimpah ari ngechek data tanah sida enggau mayuh agi utai bukai.
Iya madah, sekumbang servis e-tanah nya dipejalaika di menua nya, bisi 150,098 iku orang ke bempu tanah udah bebayar enggau penyampau RM427.2 juta.
“Tu mandangka sistem e-tanah tu mujur mantu mensia mayuh ti deka ngaturka pengawa ti bekaul enggau tanah sida enggau Opis Tanah,” ku iya.
Uggah mega minta mensia mayuh enda kelalu mayar lebuh jam ke suntuk laban nya semina ulih ngenanggul ke servis nya.
“Mensia mayuh enda ibuh nganti ngagai bulan November enggau Disember enti deka mayar tanah sida laban pengawa bebayar nya ulih dipejalaika berengkah ari pun taun tu,” ku iya. — Bernama