Iya meri jaku lalau ngetuka pengawa ba tasik kandang diatu ketegal ambun enggau umbak besai
KUCHING: Menua tu disadang nerima ujan bejurut hari ba pun minggu siti ti deka datai, tang disadang enda ngasuh ampuh bah, ku Datuk Patinggi Tan Sri Dr George Chan Hong NamDr Chan ti mega Chermin Komiti Bantu Tasah Dunya Nyadi Sarawak madahka ujan disadang enda ngetu nurun ba menua tu belabuh hari Satu, Dua enggau Tiga dalam minggu baru ti deka datai.
Ku iya, taja pia bah nyangka enda nyadi laban maya nya nadai pasang besai.
Pasang besai ke ulih datai ba peninggi 5.6 meter semina deka nyadi kena hari Minggu iya nya 17 Januari tu.
“Ujan deka nyadi belabuh ari 11, 12 enggau 13 Januari tu ba sereta menua Sarawak, taja pia ujan tu disadang enda mai bah laban pasang besai semina deka nyadi 17 Januari iya nya tiga hari udah bekau ujan bejurut tu ila,” ku iya.
Beserimbai enggau tu, perintah menua udah ngeluarka jaku tangkan ngagai mensia mayuh enda ngasuh sida ke tasik laban diatu jadi umban enggau ambun.
Nampung jaku tangkan nya, Dr Chan mega ngelalau mensia mayuh ti deka ngelantang ati nyeliahka diri mandi ba tebing tasik.
“Diatu tasik benung kudi lalu umbak besai, nya alai sida ti bisi pengawa besangkut paut enggau tasik ke lebih agi sida ke berikan, patut ngetu dulu,” ku iya.
Dr Chan bejaku munyi tu ngagai pengarang berita udah ti ninga penerang pasal gaya hari ari Opis Ngemata Gaya Hari ba opis iya di Wisma Bapa Malaysia ditu kemari.
Penerang pasal gaya hari tu dikenatika Ketuai Penulung Pengarah Opis Gaya Hari Sarawak, Haburi Hamdan.
Bisi ngulu penerang tu iya nya, Sapit Seketari Menua Sarawak.
Dr Chan madahka ba penerangnya, dia sida opis ngemata hari belabaka ribut sri menua China ti selalu mai ujan ngagai menua disadang nguing ke bukai.
Sarawak semina disadang kena tempuh ribut ari Filipin ti kurang agi mai ujan.
“Ujan lebat semina deka nyadi ba menua tu enti nyema ribut dua iti tu betempuh enggau pangan diri, enti enda baka nya dia kitai deka lubah agi ampuh bah,” ku Dr Chan.
Nyaut tanya pengarang berita, dia Dr Chan madahka ujan ti diterima menua tu dalam timpuh seminggu ti udah lalu jauh mimit enti dibanding enggau maya nya suba ba taun siti tu kemari.
Ku iya, dalam kandang seminggu ti udah, penyampau tikas ia ujan ke udah ditambun semina 120 mililiter.
“Nyadi tu bisi dua kali lipat mimit enti dibanding ba maya ti sebaka taun siti nyin suba,” ku iya nambah baru.
Beserimbai enggau tu mega, Dr Chan nyadang menua tu nyangka enda ampuh bah taun tu baka ke udah nyin taun siti nyin kemari.