Penemu ti ngelakka ‘orang dulu’ patut diiyar laban nya ngayanka kitai selalu deka dudi
KUCHING: Gerempung Graduate Dayak Sarawak (SDGA) ngasuh bala raban bansa sida tu ti bisi pemadai ngubah runding diri lalu besaup ngemansangka raban bansa Dayak di menua tu.
Presiden SDGA, Dr Dusit Jaul madahka bala sida ti bisi pemadai tu enda patut ngembuan penemu ti deka ngelakka orang bukai dulu belama enti sida deka mansang.
Ku iya, penemu ti baka tu patut diiyar laban iya baka ti madahka kitai selalu deka dudi sereta ninggal kediri di belakang orang belama.
“Mayuh utai ulih digaga kitai kena ngemansangka raban bansa laban kita bisi pemandai lalu begempung enggau pangan diri,” ku Dr Dusit.
Tang pemai ke lalu enda iya nya, lebuh raban bansa kitai tu ti bisi pemadai sereta diasuh masuk enggau SDGA lalu mansut jaku ‘ngelak ke orang dulu meh’.
Ku iya penemu ti baka tu ngayanka kitai bansa enggai dulu ari orang bukai tang rindu agi deka ninggal kediri di belakang.
“Ba aku penemu ti baka tu endah manah,” ku iya.
Dusit mansutka jaku tu ba Pengerami Makai Malam Initiatif SDGA ba siti hotel ti tebilang ditu, malam ensanus.
Dusit enggau nya ngansak bala kaban gerempung tu ngambika bebendar agi ngemajuka gerempung tu awakka sebaka enggau gerempung bansa bukai.
Ku iya, bala kaban gerempung tu patut beratika pemaju gerempung bansa bukai lalu patut besaup sereta betulung enggau pangan diri nuju pemansang.
“Enda kurang ari 800,000 bala raban bansa Dayak ba menua tu lalu enda kurang ari 10 peratus sida tu bisi pemandai, enti semua sida tu besaup mayuh utai ulih digaga kena ngemansangka raban bansa diri,” ku iya.
Ari nya bala Dayak ti bisi pemandai tu patut ngubah penemu lalu begempung enggau pangan diri kena ngemansangka raban bansa.
Ba pekara bukai bekait enggau gerempung tu, dia iya madahka SDGA deka ngatur Aum Besai Setaun Sekali (AGM) kena 20 Februari ti deka datai.
Ba aum tu ila, dia SDGA deka bejuraika langgur numbuhka pampang ba Sibu enggau Miri.
Dusit mega madahka Kaban Kunsil Nengeri Sitak Kedup, Federick Bayoi Manggie deka meri duit tulung penyampau RM5,000 ngagai gerempung tu.