KUCHING: Bisi 370 iku urang nglu Randau Pengerai ti diatur Palan Penyaga Pengerai Parkway ba sebengkah hotel ti tebilang ditu kemari.
Randau ti baka tu endang selalu diatur palan tu kena meri penerang pasal penyakit lalu chara nyaga sereta ngubat iya ngagai mensia mayuh.
Sapit Menteri Kereja Raya, Dato Yong Khoon Seng lebuh ti bejaku bejadika randau tu madahka, mensia mayuh patut diberi penerang pasal jalai nyaga pengerai diri empu.
Enggau tu iya muji palan penyaga pengerai tu laban ngembuan penyinu sereta deka ibuhka pengerai mensia mayuh.
Kelimpah ari tu ku iya, mensia mayuh mega patut nemu tanggung pengawa nyaga pengerai diri empu.
“Anang datai maya udah balat baru ka berubat, kitai patut selalu beperesa pengerang ngambika iya ulih diubat tumu,” ku Yong meri jaku lalau ngagai mensia mayuh.
Bisi enggau ngulu pengerami ti bejadika randau tu iya nya, Penulung Sapit Presiden Pengerai Parkway, Samuel Tan.
Randau tu diatur begulai enggau Institut Banker sereta SilkAir Airlines.
Bisi tiga iti keretas kereja bisi dibantaika ba maya randau tu kemari.
Siti ari keretas kereja tu iya nya pasal penyakit buah pinggang ti bantaika Kepala Bagi Beputung ti mega Urologi Kanan Gleneagles Kuala Lumpur, Dr Loh Chit Sin.
Dua iti keretas kereja ti bekaul enggau penyakit bukai sereta chara nyaga pengerai dibantai Kepala Putung Hospital Pengerai Parkway Mount Elizabeth Singapor, Dr Melvin Look enggau siku pakar ari Hospital Gleneagles Pengerai Parkway Singapore, Dr Tan Seng Hoe.