Gotong-royong meresi Pasar Sentral hari Tiga tu

0

SIBU: Majlis perbandaran Sibu (MPS) deka bekerejasama enggau tiga gerempung orang dagang ditu deka bejalaika pengawa meresi pasar sentral kena hari tiga tu.

Tuai Jawatankuasa Pasar enggau Penjaja Runcit, Kaunselor Chieng Buong Toon madah, pengawa meresi nya nyengkaum kedai basah enggau rangkai, kedai makai enggau ngirup sereta tamu.

Ku iya, orang dagang ke bejual ba pasar tu dipinta ngetuka dulu pengawa bejual sida ambis laun pan urung pukul 2 lemai hari nya kena meri awak ngagai pengawa meresi pasar nya.

Atur pengawa gotong royong tu diadang deka berengkah urung jam 1.30 lemai lalu deka dipejadika Tuai MPS, Datuk Tiong Thai King,” ku iya ba aum begulai enggau pengarang berita kemari.

Ku Chieng agi, tu keterubah iya pengawa meresi Pasar Sentral nyengkaum seluruh sitak pasar nya.

Ku iya, sebedau tu, pengawa meresi semina dipejalaika sepengudah ambis jam bejual ninting hari.

Chieng ba aum media ke sama mega merambu awak pengawa meresi pasar tu digaga tiap tiga kali setaun.

Kitai ukai aja deka bala orang dagang bejalaika pengawa bejual sida enggau likun, tang kitai mega deka mayuh ago orang datai ngulu pasar tu laban ke megai status entara tamu ke besai ba Malaysia,” ku iya.

Tiga gerempung ke bejalaika pengawa gotong royong nya iya nya Persatuan Penjaga Pasar dan Penjaja runcit, Persatuan Penjaja Pasar Sentral enggau Persatuan Penjaja Sitak Sibu enggau Maradong.