Raban bansa penan deka terus dibantu: Lihan

0

MIRI: Perintah deka terus mantu bansa Penan ti baru lepas sekula sama enggau ngerebut peluang kereja kelebih agi ba sektor pengawa perintah.Kaban Kunsil Nengeri (ADUN) Telang Usan, Lihan Jok madah penagwa tu beserimbai enggau atur deka ngemayuhka agi bala nembiak bansa Penan kereja kena nupi sida sebilik.

“Perintah enggai meda sida semina ngereja pengawa baka begiga ke jelu babas sebelah puak kampung, tang kitai deka meda sida bekenaka semua peluang ke bisi kena sida ngulih ke gaya pengidup ke manah baka bansa ke bukai di menua tu,” ku iya lebuh bejaku ngagai bala pengarang berita ba Palan Servis Mensia Mayuh Telang Usan ditu kemari.

Iya mansut ke jaku pasal dua iku nembiak penan ke abaru lepas sekula pom lima iya nya Josten Emang, 19, enggau Jely Jangin,22 ari Long Latik ke dichiri nyadi Pekerja Khidmat Singkat ba Opis Pengerijista Bansa.

Seduai ke bela lepas ari pom lima ari SMK Long Lama nya gawa ba Unit Khas Bergerak, JPN sitak mit Baram ti udah belabuh gawa kena 18 Januari datai 17 Julai taun tu.

Ku Lihan, pengawa nyiri seduai tu siti ari pengawa ke manah laban sebedau tu semina orang ke graduat ari universiti aja deka diterima.

“Ke diatu semina bisi 26 iku orang bansa Penan ke graduat ari universiti jereja ba mayuh bengkah sektor perintah lalu penyampau nya agi mimit.”

“Enggau pengawa ngambi sida kereja ti baru ambis pom lima tu, kitai ngarapka ulih meri peransang mayuh agi nembiak bansa Penan bekereja sereta bekenaka peluan pemansang ti udah disediaka perintah,” ku Lihan.

Ba konteks tu, iya madah, Parti Pesaka Bumiputera Bersatu (PBB) Telang Usan nengah Palan Servis Mensia Mayuh deka seruran ngiga peluan kena mantu anak-anak bansa Penan tu begiga ke kereja.

Lihan mega ngelalau Josten enggau Jely seruran bekenaka peluang tu enggau manah sereta ngulihka peneleba sereta penemu kelebih agi lebuh begaul enggau mensia mayuh.

Ba pengawa nya mega, Jely Jangin madah, iya berasa gaga ati enggau pengawa nyiri seduai nyadi Pekerja Khidmat Singkat ba JPN lalu bedanji deka bejalaika pengawa ti ditapi iya enggau manah.

“Enggau nya, aku ulih mantu JPN ngemudahka agi penagwa ngerijista dokumen kelebih agi ba kampung-kampung Penan laban mayuh entara sida enda nemu jaku Melayu.”

“Kelimpah ari nya, agi mayuh orang bansa Penan bedau ngembuan dokumen pengelala diri. Aku ngarap ulih meri bantu ngagai sida,” ku iya ke mega ngembuan peneleba bekereja ba kem masang paip baruh tanah Petronas di Baram.

Josten Emang mega madah, iya deka bekenaka peluang tu diberi tu enggau manah.

“Tu pengawa keterubah diterima aku, lalu aku berasai gaga bendar ati laban deka bejalaika pengawa nya,” ku iya lalu bedanji deka ngulihka mayuh agi penemu sereta penelaba ari pengawa ke dikerejaka iya nya.

Sama datai ngulu pengawa nya iya nya Seketeri Eksekutif Palan Servis Mensia Mayuh Telang Usan, Jok Eng Jok.