1,000 iku ngulu pengerami begulai rayat di Engkilili

0

ENGKILILI: Penyampau bisi 1,000 iku orang datai ari 24 bengkah rumah panjai dalam pelilih Engkilili sama bisi enggau ngulu pengerami Program Mesra Rakyat (PMR) tauka program begulai enggau rayat, ke bisi diatur ditu empai lama ke udah.Program begulai enggau bala rayat ke diatur Opis Pemansang Mensia Mayuh (KEMAS) Parlimen Lubok Antu tu udah mujur endar diatur ba Rumah Dancon anak Jandong di Kampung Bua ditu.

Pengerami ke berangkah ari jam 11 pagi tu, dipejadika Kaban Parlimen Lubok Antu, William Nyalau.

Sama bisi enggau ngulu pengerami tu iya nya, Kaban Kunsil Nengeri Sitak Engkilili, Dr Johnnical Rayong, Penyelia Kanan KEMAS Parlimen Lubok Antu, Kumpang Datuk Tutong sereta bala ketuai opis perintah enggau tuai-tuai rumah panjai ari 24 bengkah rumah.

Program tu diatur kena nerit ke kaul ke manah entara pengari perintah, ketuai opis perintah kelebih agi KEMAS enggau bala Komiti Pemansang enggau Pengelikun Kampung (JKKK) sereta mensia mayuh ke diau ba semua rumah panjai dalam pelilih Engkilili.

Mayuh macham pengawa bisi diatur sepemanjai program tu baka pengawa gutung-ruyung, poco-poco, mansut ka jaku penerang enggau jaku lalau sereta pengawa mutung kek ke ungkup bala temuai ke dipebasa.

Ba atur pengawa tu mega, William Nyalau bisi madahka geran penyampau RM15,000 ke diungkup ngagai JKKK Rumah Dancon sereta RM3,000 agi diungkup ngagai Gerempung Indu rumah panjai nya.

Dr Rayong mega enda tinggal, bela madahka ungkup geran penyampau RM10,000 ngagai JKKK iya, RM3,000 ungkup Gerempung Indu sereta RM3,000 agi enggi KEMAS Lubok Antu.