Saup sida ba pengawa ngundi enggau chara ke beresi sereta nadai bechiping ngambika pemanah sida empu enggau diri sebilik: Salang
JULAU: Rayat mayuh ba menua pesisir endang sama tau nyaup tauka meri bantu dalam proses pengawa bepilih besai ti beresi sereta nadai bechiping, ka tambah mega demokratik tang anang ngarap tauka minta sebarang ‘insentif’ lebuh ngundi.Sapit Menteri Pemadah, Komunikasi enggau Main Asal Datuk Joseph Salang Gandum ke mega Kaban Parlimen Julau madah, bayar insentif nya mega ngasuh ungkus pengawa bepilih besai tauka muai undi nya balat engkanjung betambah, ungkup siku-siku chalun ke bediri minta pilih nya.
“Enti bisi atur mayar insentif bakanya, chalun ke besai potensi nyadi tuai matak jalai sereta manah ngagai rayat tang nadai penatai belanja diri empu, iya nya kurang penatai belanjam engka tau ngujungka iya enggau bediri minta pilih, lalu tu siti utai ti ngerugika rayat, laban enda diarika orang ti manah, ti bisi potensi nyadi ketuai tinggi kaliber,”ku Salang lebuh bejaku ba sesi randau enggau atur betemu enggau mensia mayuh ba Rumah Guntor, Sungai Berkiok, Merurun enda jauh ari tu, malam kemari.
Penemu tauka persepsi ke bakatu enda tau dikembuan kitai, enda tau enda dibuai ketisi…mensia mayuh enda ulih ngarapka sebarang bayar tauka upah tajapan sida gawa bebendar ka parti.
Kebuah pia, ku sapit menteri nya, laban pengawa sida ke mantu parti nya endang ungkup kena ngulihka pengidup ti manah agi dudi hari ila, ukai mina enggi sida empu aja, tang mega ungkup bala sida diri sebilih mega,” ku iya. — Bernama