Tuesday, November 24

Insentif niki pangkat enggau elawin polis deka ditambah: Najib

0

Tu nyadika peransang ngagai raban PDRM awakka bebendar agi munaska jenayah

KUALA LUMPUR: Perintah setuju deka mayar elawin bulan penyampau RM200 ngagai kira-kira 33,000 iku pegawai enggau raban polis ke bukai ti ngembuan pangkat Polis Diraja Malaysia (PDRM) ke bejalaika pengawa am.

GAWA MANAH: Najib (tiga kiba) betabi enggau siku polis ke nerima kelala iya nya Sarjan Mohd Tarmizi husin (kanan) ari unit Tindak Khas sepengudah datai ngulu pengawa baris Hari Polis Ke-203 ba Pusat Pematih Polis (Pulapol), Jalai Semarak, Kuala Lumpur kemari. — Gambar Bernama

GAWA MANAH: Najib (tiga kiba) betabi enggau siku polis ke nerima kelala iya nya Sarjan Mohd Tarmizi husin (kanan) ari unit Tindak Khas sepengudah datai ngulu pengawa baris Hari Polis Ke-203 ba Pusat Pematih Polis (Pulapol), Jalai Semarak, Kuala Lumpur kemari. — Gambar Bernama

Bejaku bekaul enggau pekara nya kemari, Menteri Besai Datuk Seri Najib Tun Razak madah elawin ke diberi nya nyengkaum bajet tambah penyampau RM84 juta setaun.

Kelimpah ari nya, Menteri Besai mega ngenataika berita manah ngagai raban polis ke bepangkat Konstabel dataika Koperal deka niki pangkat nitihka pengelama timpuh sida udah gawa.

Ngena genteran Pekeliling Perkhidmatan 2009, raban polis ke bepangkat Konstabel deka ditikika pangkat ngagai Lans Koperal sepengudah gawa tiga taun lalu Lans Koperal deka ditikika pangkat ngagai Koperal sepengudah lima taun gawa, ku iya lebuh bejaku ba pengawa bejadika hari nyambut Hari Polis Ke-203 ba Palan Pematih Polis (Pulapol) ditu.

“Inisiatif nambahka elawin tu nyengkaum lebih 52,000 iku raban ke negmbuan lain-lain pangkat,” ku iya.

Sama bisi datai ba pengawa nya iya nya bini Menteri Besai, Datin Seri Rosmah Mansor, Menteri Dalam Menua, Datuk Seri Hishammuddin Tun Hussien, Tuai Polis Menua tan Sri musa hassan enggau Sapit Tuai Polis Menua Tan Sri Ismail Omar.

Najib ba jaku iya mega merambu balai polis ke nyulut sereta lengkas mutarka penanggul jenayah deka bulih pengelala bepelasarka pengawa ti dikerejaka sida.

“Utai ke diberi sehari tu nyadika tanda sukung sereta peransang ari perintah malas jasa raban polis ke bebendar nyaga pengelikun rayat sereta menua kitai tu,” ku iya.

Kelimpah ari nya, Najib mega ngemeranka tiga fokus iya nya integriti, efisien, sereta ulih mutarka penyalah jenayah patut dipegai ba tiap iku raban PRDM lebuh sida bejalaika tanggung pengawa kelebih agi nyaga pengelikun mensia mayuh enggau menua.

Tiga pekara nya beguna bendar ba pengawa kitai ngurangka angka kes jenayah ke nyadi siti ari pun NKRA.

“Ngurangka angka jenayah nyadi siti ari tagit sereta agenda ti penting perintah. Tanggung pengawa nya ukai semina bepanggai ba polis aja tang mega ba Menteri Dalam Menua sereta aku empu ke mega nyadi tuai perintah ke sama ngembuan tanggung jawab ke berat nyaga pengelikun rayat sereta nyapai tagit tu,” ku iya.

Najib madah, sekumbang atur NKRA dipejalaika berengkah ari taun siti nyin suba ti nagit deka nutunka angka jenayah penyampau lima persin ba taun 2010, nya berengkah mandangka tanda positif kelebih agi ba dua bulan ti keterubah taun tu iya nya nurun penyampau 13 persin ba timpuh ke sama taun nyin suba.

Iya madah, tu nyadika tanda sereta peransang kena neruska momentum ngulih sereta napao indeks KPI.

“Enti deka mujur mutarka penusah jenayah, kitai begunaka pengering ba semua aspek sereta ukai semina raban enggau tiga pekara ke disebut aku tadi, tang mega penemu sereta pengelandik bekenaka teknologi baru, perengka komunikasi ba semua aspek,” ku iya.

Menteri Besai meri chunto balai polis ke mindah kin-kitu patut ngembuan perengka komunikasi ke chukup sereta efisien kena mantu bala raban polis muntang ngereja pengawa kelebih agi ba pengawa mutarka penyalah jenayah ari nyadi. — Bernama