Rayat patut berani bekenaka teknologi baru

0

Bekenaka internet ba mayuh bengkah pengawa mega deka ngenataika mayuh penguntung ngagai rayat: Taib

KOTA SAMARAHAN: Ubah ngena teknologi baka ba menua maju bukai semina ulih digaga enggau jampat enti tiap iku orang mayuh, enda ngira umur mungkalka pengawa belabuh belajar internet.Kepala Menteri Pehin Sri Abdul Taib Mahmud madah tiap iku orang mayuh patut ngena perengka ke udah disediaka ngambika sida iya enda kena tinggal ba ubah teknologi ke benung dikemansang diatu.

Iya madahka ubah nya baka ubah ba infrastruktur jalai alun kelia, orang mayuh ngena jalai ai bebanding enggau diatu orang udah ngena kerita.

“Internet ukai pekara ngenakutka kitai. Lebih 20 taun ke udah, mayuh orang  berasai rawan hati lebuh sida iya driba laban pekara nya utai ke baru tang diatu driba kerita nyadi pengawa ke begunaka pengelandik.

“Nya alai, kitai patut berani nguji. Kitai patut belajar ari anak kitai ke berani ngiga penemu pasal teknologi baru laban pemisi teknologi baka tu, kitai deka bulih mayuh penguntung,” ku iya.

Taib ti mega nyadi Menteri Langgur Penemu enggau Pengintu Pemisi madah baka nya sebedau bejalaika sesi aum video begulai enggau Menteri Besai Datuk Seri Najib Tun Razak beserimbai enggau pengawa bejadika Mungkal Jalur Lebar Negara (NBI) ba Dewan Suarah Kota Samarahan ditu, kemari.

Sama bisi datai ba atur pengawa nya, Sapit Kepala Menteri Datuk Patinggi Tan Sri Dr George Chan enggau Datuk Patinggi Tan Sri Alfred Jabu Numpang sereta Pengarah Suruhanjaya Komunikasi enggau Multimedia Menua Zulkarnain Mohd Yasin.

Beratika pemerat perengka nya dikena ba maya kediatu ke begunaka komputer, iya madah perintah ngeletak mayuh macham pemungkal pengawa ngemansangka servis internet ba Malaysia.

Iya madah NBI ke diberi kelala ulih mantu menua tu nitihka ubah teknologi global laban baka kediatu, NBI mega dijadika palan ke tiap iku mensia mayuh kelebih agi sida ke diau ba menua pesisir ngasaika pemansang ngena internet.

“Enti nitihka penyampau broadband ke udah masuk ba Sarawak diatu iya nya dalam urung ke mimit dalam 20.4 peratus, penyampau ke deka masuk jemah ila ulih ditambah enti udah bisi NBI,” ku iya.

Ku iya, chakap ke enda tau enda ditunga perintah ba pengawa ngangkatka pengerembai bungkur internet ba sitak menua pesisir ke mayuh bepanggai ba gaya geografi menua tu nadai nagang perintah meri kelala servis nya.

“Internet nyadi palan pemadah lalu aku ngarap tiap sitak menua pesisir deka bulih penguntung ari perengka nya lalu kitai enggau naka ulih ngemansangka pengawa nya. “Taja pia, sida ke besai tuai pan sama-sama diasuh bejalaika tanggung pengawa sida iya nyadi orang ke landik ngena komputer lalu ngajar bala anak sida iya pasal penemu nya ngambika kitai sama-sama nyingkang nitihka pemansang,” ku iya.

Iya nambah baru, bala nembiak sekula diatu nadai entu suah agi bepanggai ba pengajar sida enti sida iya belajar utai ke baru laban sida iya ulih ngambi pemadah nya ari internet.

“Internet mega berat ba pengawa dagang laban tiap pengawa bejual-beli ulih dipejalaika enda ngira jam lalu ulih ngurangka kos bejalaika pengawa dagang,” ku iya.