Indu Dayak diatu bela enggau sida lelaki: Mauh

0

SIBU: Pengawa indu Dayak di dunya kemaya hari udah mayuh berubah laban sida indu ulih duduk bela baruh lalu bediri bela tinggi enggau sida lelaki.Kaban Kunsil Nengeri (ADUN) Tamin Joseph Mauh Ikeh madah, indu kemaya hari enda ngira bansa, enda sebaka enggau indu kelia ke semina duduk di rumah nyaga ruang bilik aja.

“Diatu indu ulih nyingkang lebih jauh lalu ngulihka mayuh pemujur baik dalam pengawa pelajar, dagang, politik enggau ke bukai,” ku iya.

Mauh mega madah, bala indu disemaka baka ragi pemansang menua nengah pemujur sida indu empu bejalaika pengawa.

“Kelimpah ari nya, pemujur bala indu dalam pengawa siti-siti bisi mega mai pemansang kelebih agi ngagai ekonomi ruang bilik enggau ngagai diri empu,” ku Mauh lebuh ka bejaku bejadika Aum Besai Betaun (AGM) Ke-18 Sarakup Indu Dayak Sarawak (SIDS) Pampang Sibu ba siti hotel tebilang ditu Hari Enam tu tadi.

Mauh mega nyebut, pelajar amat beguna kena bejalaika pengidup di dunya ti majak moden laban enti nadai pelajar, orang deka tinggal dalam pengidup.

“Aku minta bala indu majak ngangkatka diri enggau pemandai, tauka sekurang-kurang ia bisi pengelandik baka penau ngena jari,” ku iya.

“Enti bisi penau ngena jari, jual utai ti digaga nya ngambika ia ulih mai penguntung. Kena pengelandik nya ngiga belanja tetap, lalu enti sabar ngereja pengawa nya, udah tentu kita (bala indu) ulih dikumbai orang dagang ke mujur.”

Mauh mega minta semua bala indu, kelebih agi indu Dayak, ngambika berani nguji bejalaika pengawa dagang tauka pandai ngiga peluang dagang kena ngemansangka ekonomi ruang bilik.

Ku iya agi, pemujur dalam pengidup ukai semina bepanggai ba pelajar aja. Orang mega ulih mujur dalam pengidup enti iya bagas ngiga penemu pasal siti-siti pekara lalu meruan deka ngangkatka diri empu, kelimpah ari bisi pengerajin sereta ati ti bangat sabar.

“Anang putus pengarap enti kitai enda mujur dalam pelajar. Uji angkat lalu giga utai ti narit ati kita kelimpah ari pelajar. Udah nya, gawa enggau sabar nyentukka kita bulih pemujur,” ku iya.

“Pekara ti beguna, ansah pengelandik ti bisi ba kita. Anang enda ngena pengelandik nya.”

Nyebut pasal SIDS, Mauh madah, gerempung nya ulih nyadi ragi ti mai pemujur ngagai indu Dayak tauka Iban jemah ila.

Nengah pengawa ti digaga SIDS, iya ulih ngiring bala indu dalam semua pengawa ti mai pemujur dalam pengidup kelimpah ari nyaga pengawa asal baka betenun ti tau nyadi pengawa dagang.

“SIDS dikarapka ulih mantu bala indu Dayak tauka Iban lalu nyadi pengansak kena ngangkatka diri dalam ekonomi, pelajar, pengidup enggau ke bukai mega.

Ba jaku iya sebedau nya, Pengerusi SIDS, Ir Alice Jawan minta bala indu Dayak tauka Iban nguna gerempung nya ngemansangka diri enggau mayuh macham penemu lalu beserakup enggau pangan diri.

Ku iya, nengah penyerakup ati entara kaban gerempung, mayuh pemujur ulih diasai lalu SIDS tau nyadi siti gerempung ti dipebasa mensia mayuh.

“Kena SIDS enggau manah kena ngemansangka diri empu ngambika enda tinggal ari bansa bukai.

“Pandangka ngagai mensia mayuh iya nya indu Dayak/Iban ulih maju mega nengah SIDS ti udah lama ditumbuhka di menua tu ari taun 1957 lalu diatu udah manggai ba umur 53 taun,” ku iya.

Ba pengawa nya mega, bisi 19 iku anak raban SIDS Pampang Sibu bisi nerima peransang ti disua Mauh laban sida mujur dalam peresa sekula.

Bisi 255 indu ke mega kaban SIDS Pampang Sibu enggau AGM nya.

Sapit Pengerusi SIDS Pampang Sibu Monica Giri, Seketeri Angelyn Uchi Maseng enggau kaban SIDS bukai bisi mega enggau AGM tu.