Projek numbuh bandar baru enggau RGC deka dikemeranka dalam langgur pemansang tu
KUCHING: Kepala Menteri Pehin Sri Haji Abdul Taib Mahmud madahka pelin indu pemansang Sarawak nuju menua maju nitikha tinjau 2020, udah tembu lalu sedia deka dipejalaika.Taib madahka, dua bengkah projek pemansang ti besai sereta dipasukka dalam pelin indu tu udah sedia deka dipejalaika kena nentuka juluk menua maju dalam taun nya ila nyadi nyata.
Ku iya dua bengkah projek besai nya ia nya ngemansangka kandang nengeri enggau Palan Pemansang Menua Pesisir (RGC).
Ba projek ngemansangka kandang nengeri dia perintah deka ngemeranka numbuh mayuh agi nengeri baru ba menua tu, ku iya.
“Perintah udah nembuka pelin indu pemansang Sarawak, lalu dua bengkah projek pemansang udah dipasukka dalam pelin tu ti kena nentuka menua tu ulih nyadi menua maju datai ba 2020.
“Lalu dua bengkah projek tu ia nya pengawa ngemansangka kandang nengeri ti bekaul enggau numbuh nengeri baru enggau RGC.
“Aku andal amat nengah sukung dua bengkah projek tu ti ukai semina ngemeranka pemansang infrastruktur tang mega nyengkaum ngeringka penatai pemisi menua sereta rayat, dia menua tu deka mujur nyadi menua maju datai ba taun 2020,” ku Taib.
Iya bejaku munyi tu ngagai pemberita udah ti nerima penemuai raban ari Gerempung Pemansang Reta Tengkira enggau Industri Pengawa Berumah (SHEDA).
Rambau penemuai tu dia gerempung tu nyua Anugerah Khas ngagai Pehin Sri Taib.
Anugerah tu diberi nandaka terima kasih SHEDA ngagai kepala menteri nya laban ti udah nyadi arkitek ngelangkar dalam pengawa pemansang industri pengawa berumah ngelama tu.
Tulung ti udah ditabur kepala menteri ba pemansang industri pengawa berumah ba menua tu ia nya numbuh nengeri baru baka Bandar Baru Batu Kawah, Bandar Baru Samariang, Bandar Baru Samarahan, Bandar Baru Permaijaya, Sibu Jaya enggau mayuh nengeri baru agi ti bukai.
Bisi datai enggau ngulu penemuai SHEDA tu iya nya Menteri Pemansang Pengawa Berumah enggau Kandang Nengeri, Datuk Amar Abang Johari Tun Abang Haji Openg.
Penemuai tu diuluka Presiden SEDA, Zaidi Ahmad.
SHEDA diatu bisi 135 kaban ti nyengkaum kompeni pemansang reta tengkira enggau pengawa berumah.
Taib madahka, semua bagi pelilih menua udah disengkaumka dalam pelin indu tu lalu deka dikemansangka nitihka atur nya.
Beserimbai enggau tu iya mega madahka, pelin indu kena numbuhka nengeri baru ba Ramungan ba Lundu enggau Baram mega udah sedia deka dipejalaika.
Bejaku silik agi senentang pelin nengeri baru Ramungan, dia Taib madahka endur kandang nebing tasik ari Sematan ke Lundu lalu teruska Telaga Air, Kuching deka dipejaika.
Ku iya ti enda nyebut kemaya projek tu belabuh madahka enti tu tembu jemah ila dia ia deka mai mayuh projek pemansang ba kandang menua nya.
“Semua langgur pemansang ba pelin tu deka dipejalaika kena peringkat,” ku iya.
Berebak enggau tu lebuh ti dipinta ngenang langgur menua tu deka numbuhka 14 bagi menua.
“Nya sigi tuju ati perintah tang enti enda ulih 13 bagi pan udah ngemantupka ati,”
Ku iya, iya deka beratika pemansang siti-siti pelilih menua mit ba menua tu ti tau diangkatka jadi bagi menua lebuh dalam kandang sebedau 2020 tu.
Iya madahka, menua pelilih mimit ti deka diperatikanya ia nya menua ti udah ngembuan mayuh mensia lalu bisi pemansut penatai pemisi.
Ditanya, sekali Lawas tauka Serian ulih nyadi siti bagi menua maya tu ila, Taib madahka, Lawas udah ditemu sigi enda ulih, tang Serian deka diperatika.