KUCHING: Siku bekau nembiak universiti dipinta mayar lon Gerempung Wang Turu Pelajar Tinggi (PTPTN) RM15,000 taja pan enda kala bulih loan nya.Bekau pelajar Kolej Chermai ari Sibu tu madahka diri endang nganti pemutus ari gerempung nya pasal tagih loan tu.
Tang dataika diatu iya enda kala nerima saut aru gerempung nya pasal pekara tu, ku iya.
“Utai ti ngalitka ati aku iya surat tagih ti ngasuh mayar loan nya tumbuh datai nuju aku, taja pan aku enda kala ngena duit loan nya.
“Balat agi ngenyinuka ati lebuh aku meda surat nya dianjung luya,” ku iya.
Bekau pelajar beumur 29 taun ti madahka iya bisi nganjung peminta ngagai PTPTN ba taun 2001.
Tang taja pia sampaika iya abis belajar iya enda kala nerima pemutus ari PTPTN pasal peminta nya.
Ku iya, iya semina nerima surat pemutus ari gerempung nya ba 2004 ti madahka duit RM15,000 dianjung ngagai kolej nya.
Taja pia iya enda kala ngambi lalu ngena duitnya, ku iya.
“Aku bepanggai ba menyadi indu aku sekumbang ti belajar lebuh nya lalu enda kala ngena duit loan nya,” ku iya.
Ku iya, diatu gerempung nya udah ngengkahka nama iya dalam blacklist lalu ditagang keluar ari menua tu.
Ba penerang ti penudi PTPTN madahka iya berutang ba gerempung nya RM18,000, ku iya.
Bekau pelajar tu mansutka jaku tu lebuh ti mantaika sebana diri ngagai Parti Tindakan Demokratik (DAP), kemari.