KUALA LUMPUR: Raban Parti Penyakal udah besetuju deka engkah ka chalun ari DAP dikena napi pengawa bepilih mit kerusi sitak Sibu tu ila, pia ku ketuai sida iya Datuk Seri Anwar Ibrahim.Iya mega madahka chalun ari DAP ka diasuh betanding ba kerusi nya endang sigi pemutus penemu ari Raban Parti Penyakal Parti Keadilan Rakyat (PKR), DAP enggau PAS.
Bala raban ketuai parti sereta enggau aku empu mega deka datai ke Sibu, Sarawak kenaka 18 April tu sereta deka berandau enggau raban bala ketuai parti tu ti ba Sarawak sereta lalu ngatur program pengawa bepilih ila”, pia ku iya lebuhka ditanya pemberita ba Bangunan Parlimen saritu tadi.
Kerusi Parlimen tu puang udah bekau Datuk Robert Lau Hoi Chew ke lalu nyadi Sapit Menteri Pengangkut parai apin lama ka udah. Lau ari Parti Sa’ati Rayat Sarawak (SUPP) udah megai kerusi tu berengkah ari taun 1990.
Ba berita bukai ke besangkut paut mega, Barisan Nasional (BN) udah sedia lalu disadang ulih menang maya pengawa bepilih mit Sibu enti mensia mayuh terus nyukung BN kena ngetanka penuduk Parlimen Sibu nya, pia ku Menteri Pengawa Berumah enggau Pemansang Dalam Nengeri, Datuk Amar Abang Johari Tun Abang Openg.
Ku iya, BN patut ngemeranka Kunsil Nengeri (DUN) Pelawan enggau Bawang Asan ngambika enda meri peluang ngagai parti penyakal megai sitak nya.
“Tambah mega DUN Nangka ke dipegai pengari BN-Parti Pesaka Bumiputera Bersatu (PBB) iya nya Datuk Awang Bemee Awang Ali Basah semampai disukung mensia mayuh menua Sibu,” ku iya.
Abang Johari ke mega Sapit Presiden PBB mansutka jaku nya lebuh aum media ke diatur ba palan projek Rumah Mampu Milik (RMM) Matang Lot 5, udah iya tembu bejalai ngagai palan ngaga rumah nya, ditu kemari.
Kelimpah ari nya ku iya, parti komponen BN ke bukai deka nyaup Parti Rakyat Bersatu Sarawak (SUPP).
“Rayat di menua Sibu patut beterima kasih ngagai niang Datuk Robert Lau Hoi Chew laban mai mayuh pemansang sereta ngubah Sibu nyadi menua ke chukup mansang,” ku iya.
Pemutus maya bepilih mit Parlimen Sibu diadang ulih ditemu bekau ari Suruhanjaya Pilihan Raya (SPR) ti ngatur aum saritu.
Penuduk Parlimen Sibu puang bekau ari orang ke mangku pengawa nya Datuk Robert Lau Hoi Chew ari parti SUPP ke ngarika BN udah nadai kena 9 April tu tadi.
Abang Johari madahka iya enda besetuju enggau penerang ke dipansutka parti penyakal ti madahka perintah BN nguji deka nginti undi lalu nyediaka macham projek ba Sibu.
“Perintah seruran meri pemansang ngagai rayat enda ngira maya bepilih tauka ukai, ngambika chunto, projek tebatan banjir di Sibu endang projeng jangka panjai ari perintah, ku iya. — Bernama