Menua tu ngembuan pesaka bedau diintu enggau manah ke ulih narit temuai datai
KUCHING: Kepala Menteri Pehin Sri Taib Mahmud madah, Kuching ulih diangkatka nyadi pesaka dunya ti ketiga pengudah Melaka enggau Pulau Pinang ke udah dulu ditaga palan pesaka.Iya madahka, di Sarawak iya nya Kuching kelebih agi ngembuan pesaka bedau diintu enggau manah ke ulih narit temuai datai.
Ku iya, Kuching ke mayuh rumah-rumah lama, jerita lama berengkah ari sejarah Rajah Brooke kelia, mayuh bengkah adat enggau main asal berindik ari ke mayuh macham bengkah pupu bansa.
“Kuching ulih nyadi pesaka dunya laban ti ngembuan rumah lama ti tinggi, macham bengkah pupu bansa lalu ari nya Sarawak bisi mayuh macham adat enggau main asal.
Iya mansutka penemu nya ba aum pengarang berita lebuh pengawa aum ninting taun Gerempung Dagang Temuai Asia Pasifik (PATA) ti diatur ba Palan Konvensyen Borneo Kuching (BCCK) ditu kemari.
Perintah diatu benung ngaga keretas kereja lalu deka diberi ngagai Pertubuhan Pelajaran, Sains dan Kebudayaan Pertubuhan Bangsa-bangsa Bersatu (Unesco) nengah perintah besai.
Taja pia nganti pemutus sereta pemendar nya nguna timpuh ke lama iya abis nadai entara enam ngagai setaun.
Sarawak ti ngembuan 30 bengkah pupu bansa bisi pemereti ati sereta ulih nerima orang menua bukai ulih mai menua tu terus majak nuju pemansang.
Nambahka nya ku iya, Kuching ti diperambuka ulih nyadi pesaka dunya laban rayat menua tu nunjukka chara idup ti likun taja pan datai ari mayuh bengkah pupu bansa.
Ku Taib, rayat menua tu ti manah ati ngerinduka bala temuai datai ngagai menua tu.
“Temui rindu ati datai ngagai menua tu laban rayat kitai menua tu ngembuan pemereti ati lalu bisi sekeda sida datai baru ngagai menua tu,” ku iya.
Taib madahka, dagang temuai endang pekara ti ngasuh menua Sarawak nyulut lalu ulih narit ati temuai bukai datai kitu.
Tuju aum PATA diatur kena bejuraika isu kemaya hari dalam industyri dagang temuai sereta singkang ti deka diambi gerempung nya.
Aum ninting taun PATA nya digulu kira 136 delegasi PATA baka pengarah, kaban enggau orang gawa enggau opis dagang temuai.
Bisi sama datai ngulu pengawa nya Greg Duffell, Chermin Pata Phornsiri Monaharn, Chermin Dagang Temuai Sabah Zainal Adlin, Yayasan Warisan Malaysia Ahmad Sarji Abdul Hamid, Ketua Pengarah Eksekutif Malaysia Airlines Azmil Zaharuddin, Sapit Presiden Gerempung Pesaka Sarawak Philip Chang, Sapit Kepala Menteri Tan Sri George Chan Hong Nam, Sapit Menteri Menteri Dagang Temuai Datuk Dr James Dawos enggau ke bukai.