KUALA LUMPUR: Kira bisi 17 kes penyalah rama enggau 43 tangkap nya sida nembiak menua datai ke udah dirikut ba menua tu sepemanjai taun 2009, Dewan Negara dipadah kemari.Sapit Menteri Pengawa Dalam Menua Datuk Wira Abu Seman Yusop madah ba timpuh Januari ngagai Mac taun tu bisi 14 kes ke ngujungka 22 iti tangkap udah dipejalaika.
“Enti dibanding enggau pemayuh penyalah rama taun dulu ke bisi 209,417, kes ke dikereja nembiak menua luar nya bisi 0.008 persin aja. Lalu ba timpuh ke sama taun tu, pemayuh kes udah diripot nya 45,805 kes enggau 0.03 persin ari nya digaga nembiak menua luar,” ku iya ba saut tanya lebuh Aum Dewan Negara ditu kemari.
Iya madah munyi nya lebuh nyaut tanya ari Senator Tan Sri Jins Shamsudin ke minta Menteri Pengawa Dalam Menua mantaika statistik kes penyalah rama ba menua tu ke dikereja nembiak menua luar lalu deka nemu chara perintah mutarka penanggul tu.
Ku Abu Seman, polis seruran matau pengawa enggau ulah ke dikereja nembiak menua luar nya ke sekula ba semua palan pelajar tinggi (IPT) perintah enggau pribit enggau kerejasama Opis pelajar Tinggi sereta sida Imigresen.
“Sida IPT mega udah dipinta meri penerang ngagai nembiak kelebih agi nembiak menua luar bekait enggau adat sereta undang-undang sepengelama sida belajar ba menua tu kelimpah nyaga budi basa,” ku iya.
Abu Seman madah kereja tu semampai digaga belama ngambika nembiak nya nitihka atur sereta nyaga budi basa nitihka adat menua tu.
Lebuh nyaut tanya sekalika perintah bisi ati nganjung nembiak menua luar pulai ke menua sida enti ditemu ngereja pengawa salah, Abu Seman madah enti sida ditemu salah sida deka nerima ukum setipak enggau penyalah nitih undang-undang menua tu.
“Udah bejalaika ukum, baru sida nya deka dianjung pulai,” ku iya.
Bejaku ngenang sekalika Opis Pengawa Dalam Menua kena nyeliah diri ari betapi penanggul nembiak menua datai nya’lenyau’, iya keran madah sida IPT enda tau enda numpuka pekara tu ngambika iya enda nyadi ba palan pelajar sida.
“Pengawa nyaga utai tu baruh Opis Menteri Pelalar Tinggi. KDN semina ngemataka utai tu ngambika iya enda nyadi”. — Bernama