Adit madahka dua iti parti tu semina ngemeranka pengundi China lalu enda manggaika pengarap ngagai raban bansa Bumiputera
KUCHING: Parti Cinta Malaysia (PCM) meda Parti Tindakan Demokratik (DAP) enggau Parti Sa’ati Rayat Sarawak (SUPP) enda chukup kriteria tau nyadika pengari rayat ba sitak Parlimen Sibu.Chermin PCM, Gabriel Adit Demong madahka enda milih ni bagi parti dua iti tu menang ba pengawa bepilih mit parlimen ti deka datai tu ila, tang dua iti parti tu sigi enda ulih nipakka tanggung pengawa nyadi pengari ke pupu raban bansa ba sitak nya ila.
Ku iya, enti nyema DAP menang dia parti tu, iya semina deka ngemeranka raban bansa Cina ba kandang nengeri nya lalu nyeliahka diri ari raban bansa bukai.
“Nya alai enti nyema DAP dipilih ba pengawa bepilih tu ila, dia raban bansa Bumiputera anang ngarapka parti tu ulih ngarika sida iya,” ku iya
SUPP mega sebaka laban parti tu endang bisi didinga madahka semina deka numpuka batang pengawa ngulihka sukung ari raban bansa Cina ba sitak parlimen nya, ku iya.
Adit madahka iya bisi ninga parti tu ti ngenang diri semina manggaika pengarap ba raban bansa nya (Cina) ba pengawa bepilih tu ila.
Lalu enti nyema SUPP dipilih ba pengawa bepilih mit tu ila, dia raban bansa Bumiputera ba sitak nya deka terus tinggal lalu parti tu deka ngasaka juluk konsep 1Malaysia ari perintah besai.
“Aku semina bisi meda siti penyelaie entara DAP enggau SUPP, ia nya siti parti penyakal lalu siti parti perintah BN, kelimpah ari nya konsep enggau juluk parti dua iti tu nadai bida enggau pangan diri.
“Dua itu parti tu sama bechiping lalu enda bepegai ba konsep 1Malaysia,” ku Adit ti lalu madahka utai ti disebut iya tu ayas bendar ari perati iya sekumbang timpuh dua iti parti tu nyediaka diri deka napi pengawa bepilih nya nengalamatu.
Adit mansutka penemu tu lebuh ti ditanya pasal penyedia parti tu ba pengawa bepilih mit sitak parlimen ti diwan tebal agi raban bansa Cina.
Iya bejaku munyi nya lebuh ti dikerandau Berita Iban senentang pekara tu, kemari
Adit mdahka, ari nya ngelalau rayat ba sitak parlimen nya ngambika berunding panjai sebedau ti ngaga pemutus penemu diri maya pengawa bepilih nya ila.
Ku iya, enti nyema bisi parti bukai ti belalauka semangat 1Malaysia ti tulin sereta sedia deka ngarika semua pupu raban bansa sekalika Cina, Melayu enggau semua raban bansa Dayak, nya meh patut dipilih sida.
Lebuh ti ditanya sekalika PCM deka ngengkah pengari ba pengawa bepilih tu ila, Adit madahka parti nya diatu apin ngaga penutus pasal pekara tu.
Ku iya, parti tu endang udah bisi pengari tang pemutus nya semina deka ayan lebuh maya hari ngantung nama pengawa bepilih nya ila.
Komiti Pengawa Bepilih (SPR) udah netapka 8 Mei tu endur ngantung nama pengawa bepilih nya lalu 16 Mei hari muai undi.
Pengawa bepilih mit tu diatur udah bekau pemati Datuk Robert Lau Hoi Chew ti mangku penuduk nya kenyau ari 1990.
Niang Datuk Robert Lau ti mega Sapit Menteri Pengangkut udah midang kena 9 April tu tadi.
Niang ke pengari ari SUPP udah ditetapka BN diganti enggau petunggal iya empu, Robert Lau Hui Yew ari parti nya mega, kena ngetanka penuduk tu ngarika BN rambau pengawa bepilih tu ila.
DAP dipelabaka deka ngengkahka chermin parti nya, Wong Ho Leng.
Sitak Parlimen Sibu ngembuan 54,695 pengundi lalu tebal agi bansa Cina.