Monday, April 22

Orang kedai mejal pemeli gula tau diukum RM100,000

0

KUCHING: Orang kedai ti ngegap orang mayuh ke bebeli ke barang sida ngasuh meli barang bukai sebedau ti tau meli gula ulih ditinggang ukum RM100,000.Tuai Opis Menteri Dagang Dalam Menua, Kopeasi enggau Orang ke Bebelika Barang (KPDNKK), Wan Ahmad Uzir Wan Sulaiman madahka orang kedai ti ngaga ulah baka tu tau didawa nengah Akta Kawalan Bekalan 1951, ti mai ukum RM100,000.

Ku iya, nadai udang-undang ba menua tu ngasuh bala pemeli meli barang enda tau enda meli barang bukai dulu baru ulih tau meli gula.

“Aku nemu pekara tu bisi nyadi, nya alai enti bala pemeli bisi tetemuka ulah orang kedai ti baka tu tau ngeripotka pekara nya ngagai opis tu,” ku iya.

Uzir mansutka jaku tu lebuh ti ngenang pasal sebana orang ke deka bebeli gula ti bisi diripot dalam surat berita Borneo Post apin lama ti udah.

Berebak enggau pekara tu Kaban Parlimen Serian, Datuk Richard Riot mega berasai tekenyit ati lebuh ti tetemuka orang kedai minta orang ke bebeli gula enda tau enda meli barang bukai dulu enti deka meli 2 kilogram gula.

“Aku tekenyit amat ninga orang kedai madahka nadai gula, lalu semina siti kedai ti bisi gula tang ngasuh orang meli barang bukai dulu nya baru tau meli 2kg gula,” ku iya.

Lebuh ti ngenang pasal penyuntuk gula, Uzir madahka penanggul enda jadi lama lalu ia deka pulai baka selama udah tu ila.

“Penanggul tu enda lama lalu ia ukai semina nyadi ba Serian tang mega ba endur bukai di menua tu,’ ku iya.

Opis tu mega udah nganjung 158 tan metrik gula ngagai Serian kemari kena mutar penusah tu.

Ba Selangau, bisi 16 iti team udah ngerijista diri ba pekit main bol 9 sepiak enggau sepak takraw ti udah mujur diatur Raban Nembiak Parti Rayat Sarawak (PRS) sitak Tamin ba SK SLDB, Ladang 3, kena hari Lima tu tadi.

Tuai Nembiak PRS sitak Tamin, Anderson Dato bejadika pengeraminya ti diatur pengelama dua hari.