KUCHING: Menteri Pengawa Berumah enggau Pemansang Kandang Nengeri, Datuk Amar Abang Johari Tun Abang Hj. Openg madahka perintah patut bejalaika siti atur penemu kena jaga orang meskin berindik ari peniki rega gula, petrol enggau gis.
UDAH TEMBU MITING: Abang Johari bejaku ba aum pemberita kena madahka atur pengerami Festival Bubur Pedas enggau Bubur Lambuk Sarawak ti deka diatur ba sereta menua tu beserimbai enggau nyambut Bulan Puasa ti deka datai.
Johari madahka, tuju perintah ti nikika tiga bansa barang ti diguna tiap hari nya endang dikena tentuka sabsidi diberi ngagai orang ti patut.
Ku iya, nya alai udah tu ila dia perintah deka ngadaka siti atur penemu kena nentuka orang ti seranta enda kena tinggang penusah ari rega gula, miyak enggau gis ti ditiki tu tadi.
“Perintah udah beratika enggau silik sebedau ti niki rega tiga bansa barang tu.
“Udah tu ila baru nyangka perintah deka beratika jalai meri sabsidi bekaul enggau tiga bansa barang tu ngagai orang ti patut diberi sabsidinya,” ku Johari.
Enti nyema sabsidi ba tiga bengkah barang tu enda dikurangka dia orang ti bepemisi deka terus bulih penguntung ba rega sabsidi tu.
Johari beserimbai enggau pekara tu madahka sistem bekupon patut bendar diadaka ngena tentuka orang meskin terus ngasaika sabsidi ba tiga bengkah barang tu.
Ku iya, orang misken tauka seranta tau diberi kupon ti baka tu ngambika sida ulih meli tiga bengkah barang tu ngena rega ti murah agi.
“Sistem bekupon patut bendar diadaka kena nyaga orang seranta tauka kurang penatai pemisi ari ti dituntung penanggul rega baru gula, minyak enggau gis ti ditiki tu,” ku iya.
Johari manstuka jaku tu ba aum pemberita ti diatur ngena madahka program Festival Bubur Pedas enggau Bubur Lambuk Sarawak 2010, kemari.
Johari lebuh ti ngetanka penemu tu madahka, diatu semua orang sekalika meskin tauka kaya sama ngasaika rega ti sebaka.
Orang ti ngena kerita besai enggau mit sama meli minyak kena rega ti sebaka, ku iya.
Pia mega gula enggau gis semua orang sama meli ngena rega ti sebaka, ku iya.
“Sabsidi patut semina diungkupka ngagai orang ti kurang penatai pemisi, nya alai udah tu ila dia sabsidi tu semina deka diasaika orang ti seranta aja,” ku iya.
Ensanus perintah madahka rega baru tiga bengkah barang nya ti berengkah kemari.
Gula ditikika 25 sen sekilogram, gis 10 sen lalu petrol 2 sen seliter