BN seruran meri pemansang ngagai rayat

0

KUCHING: Barisan Nasional (BN) mengkang meri pemansang ngagai Sarawak taja pan seruran dipejai parti penyakal.

JAMES MASING

JAMES MASING

Sarawak tetap nerima sukung ari rayat 64.1 persin nitihka pansik Merdeka Center

Presiden Parti Rakyat Sarawak (PRS) Dato Sri James Jemut Masing madah kelimpah ari seruran mantah tauka bejai, penyakal semampai mansutka isu tanah hak adat Bumiputera (NCR) laban deka ngasuh runding rayat saru.

Taja pia BN endang mengkang megai menua Sarawak, ku iya.

Iya madahka, juluk ati penyakal ti deka megai menua semina masau jam aja.

“Perintah BN nemu tuju pemansang ti deka dibai ngagai menua tu lalu seruran bebendar ngemajuka Sarawak kena nentuka semua pupu bansa sama bela ampit.

“Nadai reti kitai besaut jaku enggau sida laban nya masau jam aja,” ku iya madah ngagai Utusan Borneo kemari.

Iya ke dipinta meri penemu bekaul enggau Merdeka Center ti nunjukka 64.1 persin ‘responden’ ari Sarawak ke madahka diri terus meri sukung ngagai BN.

Nitihka tinjau Merdeka Center nya ukai semina nunjukka rayat Sarawak nyukung BN, tang penyampau orang ke meri sukung majak niki iya nya 1.1 persin lebuh maya bepilih taun 2006.

Pekara ti bekaul enggau  NCR ti selalu dikena penyakal ku Masing ke mega Menteri Pemansang Tanah madahka isu nya nadai reti tang semina nyadi cherita maya bepilih aja.

“NCR ukai nyadi isu, nya pansut maya bepilih aja lalu ketegal penyakal isu tu nyadi sensitif ngagai raban bansa menua pesisir,” ku iya.

“Perintah menua nemu penanggul ke nuntung rayat , tambah mega bala pengari rayat mayuh ke datai ari menua pesisir, lalu nadai kebuah kitai deka ngenusahka raban bansa kitai empu,” ku iya.

Nya kebuah ku Masing, perintah menua enggau Unit Pengurusan Penyampaian dan Pencapaian (PEMANDU) bisi chara ke chukup chakah ngemansangka NCR.

Sarawak tetap nerima sukung ari rayat 64.1 persin nitihka pansik Merdeka Center