KUCHING: Taja pan nadai apai indai agi ke ngintu sida iya, Rumah Anak Yatim Laila Taib (RAYLT), ba Jalai Sultan Tengah ditu nya meh ke alai 160 iku nembiak diau, ke bekaul entara sida baka menyadi diri empu sereta orang gawa ba palan nya ke diambu sida iya nyadi diri sebilik.
Menija Besai Lembaga Kebajikan Anak Yatim Sarawak Juliyanah Abdul Hamid ke dikangau bala nembiak dia ‘indai’ siku orang ke bempu tanggung pengawa ke besai ngintu bala nembiak, ngintu sereta ngemataka orang gawa ba palan nya.
Ku iya, pemerat iya ba sida nembiak ke patu balu tu deka meda bala nembiak dia nyadi orang ke menyana sereta mujur.
“Ba taun tu aja, sembilan iku nembiak kami ari palan tu mujur nyambung pelajar sida iya ngaga universiti ke dispunsa ulih PTPTN, Yayasan Sarawak enggau sekeda ijinsi bukai. Lalu sekeda diatu udah nyadi pakar geologi, injinia, luya enggau pengajar.
“Sida ke enda tentu mujur ba pelajar bisi udah masuk Institut Kemahiran Mara (IKM), MARA tauka ILP, belajar pengelandik. Nya ngayanka semengat sekeda nembiak ditu sigi kering laban sida iya nemu udah nadai orang bukai ke ulih mantu sida mansang, semina sida iya empu,” ku iya madah ngagai Utusan Borneo udah abis nerima temuai ari Lembaga Pembangunan Industri Pembinaan Malaysia ditu, kemari.
Ku Juliyanah baru, taja pan palan nya udah lebih 17 taun dibuka tang belanja ngintu palan nya mayuh datai ari siku-siku ke bisi dalam urung 90 persin sereta ungkup diberi perintah.
“Nya alai kami ba palan tu ukai semina ngarapka bantu orang bukai tauka ari perintah, tang kami empu mesti ‘turun padang’ ngulihka geran kami empu. Ngintu sereta nyaga palan tu begunaka lebih kurang RM80,000 sebulan,” ku iya lalu nambah chermin palan nya empu Datuk Daud Abdul Rahman orang ke selalu betatika pemisi palan nya.
Ba penerima nembiak patu balu ngagai palan nya, ku Juliyanah sida iya mega nerima nembiak patu balu ari diri sebilik ke ukai Islam mega kelimpah ari diri sebilik ke meskin seranta.
“Kami nerima nembiak patu balu sereta sida nembiak ke datai ari diri sebilik ke meskin seranta mega, iya nya baka ruang bilik ke semina bisi pemisi penatai kurang ari RM750 sebulan,” ku iya.
Atur masuk ngagai palan nya semina nganjung nembiak patu balu kia lalu betemu enggau pegawai palan nya, ngemai sekeda dokumen pemati apai indai sida, lalu nadai orang ngintu sida, lalu ba sida ke meskin seranta ngemai dokumen bukai ke bisi bekait enggau penatai pemisi apai indai sida, ku iya.
Ba pengawa CIDB enggau Akademi Binaan Malaysia (ABM) ke udah mutus deka mantu palan tu ngaga manah agi perengka guna endur nya, ngechat sereta ngaga alai belelak, ku Juliyanah, RAYLT beruntung laban dipilih ulih CIDB ari entara pemayuh gerempung mensia mayuh.
“Bantu ke diberi ulih CIDB dikarap ngaga sereta ngelantang hati bala nembiak patu balu ke diau ba palan tu. Laban palan tu nyadi rumah bala nembiak ditu.
“Tu tanda ke manah merindang bala nembiak laban sida enda lama agi bisi endur belelak enti udah abis sekula, manah ke pengerai sereta ngangkatka runding sida iya lebuh meda lanskap digaga enggau manah,” ku iya lalu ngarapka pemanah pengawa CIDB deka dikerembai ngagai rumah patu balu sida ba pampang bukai baka Sibu enggau Miri.