Ketegal putus pengerindu, siku lelaki nelan 70 igi pil

0

KUCHING: Siku lelaki ti kelalu tusah ati putus pengerindu lalu madahka diri nelan 1,000 igi pil ngetanka pemedis (penahan sakit) ngasuh apai indai iya bangat irau ati lalu beguai ngagai sepital ari ruamh sida ba Balai Ringin.

Iya ti beumur 22 taun gawa ba kedai komputer ti enda nurun gawa pagi kemari ngujungka orang ke endur iya bekereja ngasuh siku agi orang ke sama gawa enggau iya ngelawa bilik sewa ba King Centre.

Lebuh orang ti anjung ngabas, iya tepedaka lelaki nya benung enda nemu diri lalu lelaki nya madahka iya nelan 1,000 igi pil ngetanka pemedis ketegal tusah ati putus pengerindu enggau pangan iya.

Laban tekenyit ninga penyampau pil ke ditelan lelaki nya, dia iya lalu berumban nganjung ngagai Sepital Besai Sarawak (HUS) lalu madah ngagai apai indai lelaki nya.

Pengudah nerima berita nya, apai indai lelaki nya berumban ngejangka Balai Ringin tang seduai iya lantang agi ati lebuhka dipadah semina nelan 70 igi pil aja.

Diatu lelaki nya benung diperubat ba sepital lalu diripotka stabil.

Ba kes kebukai, siku lelaki ari Semariang diserahka ngagai polis ketegal ditangkap enchuri gula batu ba sebengkah palan bebeli barang di Batu Kawah kemari.

Lelaki nya beumur 36 taun ditangkap sekuriti ba endur ke nyadi pengudah ti dipeda nyimpan gula batu dalam kochek tanchut.

Pegawai Keselamatan ti meresa lelaki nya tetemuka 11 bungkus gula batu enggau pudina.

Lelaki nya diserahka ngagai siku polis ti bisi ba palan bebeli barang lalu dibai ngagai Balai Polis Simpang Tiga kena bejalaika pansik.