Pansik dipejalai kena napi penemu NGO menua luar

Jaku selabubu gerempung nya ti seruran besalah ke perintah ngemansangka tanah rayat

KUCHING: Sarawak dia­dang ulih mujur bejalaika pengawa pansik pasal tan­ah gambut enggau paya, ke lalu ulih ngubah penemu sekeda gerempung ukai dikuasa perintah (NGO) kelebih agi ari menua luar ti besalahka perintah nge­lama tu.Menteri Pemansang Tan­ah, Dato Sri Dr James Masing ngadang pansik ti dipejalaika ngasilka pekara ke bendar ti semampai dikena NGO ari menua luar ti besalahka perintah.

“Nengah pansik ti dipe­jalaika, aku ngarapka pekara ti bendar ditemu ke lalu ulih nyaut penemu NGO ti selalu bejai ke perintah,” ku iya madah ngagai pengarang berita udah tembu ngelawa Unit Makmal Penyelidikan Tanah Gambut Tropikal (TPRL) sereta ngulu pen­gawa Rumah Tebuka Hari Raya ti diatur TPRL ditu kemari.

Masing enggau silik nerangka petenah nyadi ketegal NGO nya ke diasuh tauka dipelanja sekeda ra­ban dalam ekonomi ke deka nyakal pemansut ari kelapa sawit.

Iya madahka sekeda NGO ditaja ari menua Kesatuan Eropah (EU) ti ngegaika pemansut kelapa sawit.

“Berindik ari nya, mayuh ripot enggau pekara ti bendar ke dipansutka enda sebaka, laban NGO nya nyukung jurai ari penaja tauka orang ti melanja.

Nitihka iya, pemansut asil ari kelapa sawit lebih tinggi ari pemansut kebukai baka kacang soya, leka anggur enggau bungai matahari.

“Diatu, kelapa sawit udah nyadi siti ari pemansut min­yak enggau lemak pemadu mayuh ngagai dunya iya nya urung 60 persin,lalu ditang­kanka kacang soya, leka ang­gur sereta kebukai,” ku iya madah enggau terang.

Masing madahka, NGO semina ngadaka pekit ekono­mi, lalu rampa menua sereta penusah rama nyadika isu ti enda patut dikereja ari pun.

Masing mega mantah NGO ari menua luar ti man­sutka penerang ke enda betul sereta nyangka perintah menua enda beratka rayat dalam ngemansangka tanah baka betanamka kelapa sawit.

Nitihka iya, sida nya seke­da ari NGO ke tau dikumbai sumbung.

“Sida patut nemu kita sebaka enggau sida , am­bika chunto nerima latih ke sama enggau sida ba institusi barat, kitai mega nemu pekara ke dikerund­ing sida.

“Rayat ti milih kitai, nya alai kami semampai bejalaika pengawa enggau bebendar dikena mantu sida.

“Ngagai NGO ari menua luar, sangka enggau penemu ti madahka perintah enda ngemeratka rayat nya amat salah,” ku iya.

Bisi sama ngulu pengawa nya, Sekretari Perintah Menua, Datuk Amar Mohd Morshidi Abdul Ghani eng­gau Tuai TPRL Dr Lulie Melling.