Semua rayat deka nyepi penatai pemisi ke tinggi, ku Idris
KUCHING: Polisi Program Transformasi Ekonomi (ETP) siti polisi ke besai sereta konsisten ke ulih dikena ba serata menua Malaysia.
Menteri ba Opis Menteri Besai Dato Seri Idris Jala madah taja pan iya siti polisi ETP ke besai tang nya bepanggai ba sebuah-sebuah menua.
“Enti kitai beratika sebuah menua, reti nya bisi elemen alai kitai ulih ngubah nitihka pemisi sebuah-sebuah menua. Iya baka nya laban kitai ngaga program ETP menua kitai empu nitihka penatai pemisi menua.
“Baka ba sitak Koridor Kuasa Tau Dikena Baru Sarawak (SCORE) iya sigi dikena menua Sarawak aja. Tang enti sema kitai ngambi chunto baka ba sitak Iskandar Johor, nama utai kemisi ba Iskandar nya, nya utai pemerat ba Johor,” ku iya madah ba aum media udah abis meri licha ba Hari Terbuka ETP ba Hotel Four Points ditu, kemari.
Nya alai ku Idris, Perintah Besai enggau Menua patut sama-sama megai tanggung pengawa tu nitihka strategi ti sebaka ari perambu ke besai tang bakani ku ngemutarka nya ila, nya barang ku atur siti-siti menua nitihka pemisi sida iya empu.
“Gaya ekonomi ke manah ba Sarawak, nya nitihka pekara ke relevan ba Sarawak. Tang tuju iya siti aja, iya nya sama-sama beratika Sarawak, semenanjung enggau Sabah sama-sama deka ngasaika penatai pemisi ke tinggi lalu Penatai Pemisi Menua Kasar patut diulih kitai semua datai ba taun 2020,” ku iya.
“ETP tu mungkur semua sitak menua enggau pupu raban bansa enda ngira sida ke diau ba mengeri, menua pesisir tauka ba ulu entigis,” ku iya
“Kitai udah milih mayuh macham sektor nyengkaum menua pesisir, lalu siti ari bagi ke besai nya, pengawa betanam betupi,” ku iya.
Atur 11 Bidang Ekonomi Utama Negara (NKEA) ti nyengkaum sektor industri besai ba baruh ETP enggau 68 Projek Keterubah (EPP) ba Sarawak deka ngemansangka penumbuh ekonomi mensia mayuh ke diau ba nengeri enggau ba menua pesisir.
Entara penatai pemisi ekonomi ke disengkaum dalam NKEA tu iya nya beratika pemerat asil ekonomi ari minyak, gas enggau kuasa, karan enggau elektronik, minyak sawit enggau pengawa betanam betupi.
Kelimpah ari nya, Idris nambah tiga EPP ba baruh NKEA iya nya minyak, gas enggau kuasa ke diungkup kena ngeluarka minyak, gas bisi bekait enggau Sarawak.
“Entara utai ke deka dikereja kita iya nya ngidupka baru palan minyak enggau gas ke udah bisi baka kediatu, ngemansangka palan minyak enggau gas ke mit-mit lalu ngerembaika palan bukai ba tasik kitai,” ku iya.
Kelimpah ari nya, 25 EPP enggau takar Asil Kasar Penatai Pemisi Menua (GNI) dalam urung RM66 biliun ba taun 2020 jemah ila dipelaba deka ngenataika lebih 300,000 peluang pengawa ke rayat menua pesisir ba menua tu.
“Ari 8.7 juta mensia mayuh ke diau ba menua pesisir ba Malaysia, 2.7 juta ari penyampau nya, sida ke agi diau ba menua pesisir ba Sarawak.
“Ari 68 projek tu, kitai ulih naga urung 300,000 lebih peluang pengawa ke bisi diagihka ngagai rayat kelebih agi rayat ke diau ba menua pesisir.
“Kitai udah nyemetak bendar ba runding kitai laban kitai meri fokus ba pekara betanam betupi, pengawa dagang temuai, akuakultur, kebun sawit enggau ke bukai lalu penyampau peluang pengawa ke datai ari sektor tu bisi penyampau 300,000 peluang pengawa,” ku iya.
Lebuh ngatur perambu tu ku Idris, sigi bisi disangkung ke rayat menua pesisir laban ku iya Menteri Besai udah meri kelala rambai jaku 1Malaysia, “Rakyat Didahulukan, Pencapaian Diutamakan”.
“Ba baruh model ekonomi baru (NEM) kitai deka ngulihka penatai pemisi ke tinggi sereta negapka model nya ulih tan lama,” ku iya.
Entara sektor NKEA bukai ke sama diberi kelai ulih ngangkatka ekonomi ba Langgur Pemansang Malaysia ke-10 tu iya nya baka pekara wang, pengawa dagang temuai, pengawa dagang, borong enggau runchit, pelajar, pengerai sereta isi penyambung enggau perengkaguna.
ETP mega naga penumbuh GNI ulih japai urung tiga kali ganda ari RM660 biliun ba taun 2009 ngagai RM1.7 triliun ba taun 2020.
Sama bisi datai ngulu pengawa nya kemari, Kepala Menteri Pehin Sri Taib Mahmud, ke disempulang sapit iya Datuk Patinggi Tan Sri Dr George Chan enggau Datuk Patinggi Tan Sri Alfred Jabu, Menteri Pengawa Berumah enggau Pemansang Kandang Nengeri Datuk Amar Abang Johari Tun Openg enggau Sekretari Perintah Menua Datuk Amar Mohd Morshidi Abdul Ghani.