MIRI: Mayuh macham adat asal ti dikembuan pupu raban bansa ba menua tu siti ari pengering ti patut ditanka nembiak rebak dudi.
Chairman Gerempung Nembiak Menua Serakup Sarawak (SABERKAS) Miri, Datuk Lee Kim Shin madahka, udah nyadi batang pengawa raban nembiak ngetanka adat asal laban nya meh pemanah enggau penyelai pupu raban bansa ba menua tu.
“Rayat patut nganggap mayuh macham adat asal ba menua tu siti ari pengering menua. Kitai (SABERKAS) ngarapka nembiak rebak dudi ngeringka semangat sereta ngetanka penyelai adat asal kitai ,” ku iya.
Lee ke lalu nyadi Menteri Muda Penyambung bejaku munyi nya lebuh ti bejadika pengerami Hari Raya Aidilfitri ti diatur SABERKAS Miri ba Dewan Suarah demalam.
Ngenang pekara nya baru,iya madahka pengawa ngaga Rumah Terbuka ba tiap iti pengerami ti diintu sigi besai endar reti sereta mandangka penyerakup lalu bebasaka pangan diri.
Ku iya, bala temuai tetarit sereta temegah ati enggau konsep Rumah Tebuka ti meransang mensia mayuh ari genap raban pengabang sereta ngerami pengawa nya begulai.
Bejaku ngenang nyerakupka semua raban nembiak , semangat Siti Nembiak Sarawak patut ditanam ba runding raban nembiak sebaka enggau juluk ti bepelasarka 1Malaysia.
“1Malaysia nyamin pemansang menua tu jemah ila. Taja pia, pemujur Satu Malaysia bepanggai ba rayat ngambika bala nembiak rebak dudi terus beserakup belama,” ku iya.
Berebak enggau nya,bisi 15 unit SABERKAS Miri begulai ngemujurka pengerami nya sereta ngidangka pemakai 1Malaysia.
Sama enggau ngulu pengerami nya ADUN Pujut Andy Chia, Seketeri Politik Sebastian Ting enggau Chairman pengatur pengawa ke lalu nyadi mandal chairman Saberkas Miri, Samat Alip.