KAPIT: Opis Kampung Kapit udah ngerami 12 iku raban opis nya ti ditikika pangkat sereta deka dianjung gawa ba menua Miri, Bintulu, Sibu enggau Sarikei enda lama agi.
Pemesai Opis Kampung Pelilih Menua Kapit, Saga Ludan bejaku madahka, kelimpah ari ti ngerami sida ti ditikika pangkat nya, pengerami nya mega diatur nyerumba pengawa ngintu Hari Raya Aidilfitri.
“ Aku ngenataika pengaga ati ngagai 12 iku raban Opis Kampung Kapit ti udah ditikika pangkat sereta deka dianjung gawa ba endur baru enda lama agi.
Aku arapka sida gawa bebendar ba endur baru nya ila. Beserimbai enggau tu kitai mega ngintu pengerami Aidilfitri kena ngerapitka kaul entara semua kitai,” ku iya.
Ku iya, kelimpah ari ti ngintu dua iti pengerami nya, sida mega gaga ati nyambut penatai siku raban baru iya nya Joseph James Victor ti dipaduka nya Sapit Pemesai Tadbir ba Opis Kampung Kapit.
“Kelimpah ari ngerami sida ti ditikika pangkat, kitai mega berasai gaga nyambut penatai siku raban baru lalu arapka iya ulih nelebaka diri ditu sereta gawa enggau bebendar begulai enggau kitai,” ku iya.