Ingatka 16 September 1963 nitihka penerang ti betul

0

MUKAH: Nembiak rebak baru patut ngingatka haribulan 16 September 1963, laban enti nitihka penerang ke betul, Sarawak begulai enggau Sabah sereta Semenanjung ngaga menua Malaysia maya nya.

Kaban Kunsil Nengeri Jemoreng Abu Seman Jahwie bejaku munyi nya ba pengerami Aidilfitri Politeknik Mukah (PMU), ditu kena malam hari Minggu tu tadi.

Nunda ku iya, sebarang penyaru bekaul enggau penerang nya tau ngujungka nembiak rebak dudi saru penemu bekaul enggau tusun jerita menua 16 September.

“Bisi sekeda raban madahka haribulan 16 September maya  Sarawak begulai enggau Sabah nyadi kaban Malaysia. Penerang nya salah. Pekara ke benar iya nya Sarawak, Sabah enggau Semenanjung begulai ngaga menua Malaysia maya nya.

“Nya alai, nembiak rebak baru patut ingatka 16 September nitihka penerang ti betul. Berengkah ari nya menua Sarawak terus mansang begulai enggau Sabah sereta Semenanjung ari baruh nama siti nama iya nya Malaysia,” ku iya.

Seman mega muji raban PMU ketegal udah mujur ngatur pengerami Aidilfitri sereta ngemai pengabang ari semua pupu raban bansa enggau pengarap.

“Pengering penyerakup siti ari pekara ti nentuka pemansang fizikal ulih dikereja enggau manah ba menua tu taja pan bisi penanggul ari segi rampa menua.

“Aku berasai gaga endar ati diperindang enggau main baka tanda enggau belagu ti dibai mayuh bengkah pupu raban bansa baka ke malam tu. Pengerami ti bekonsepka 1Malaysia  tu sigi datai ari runding ti chukup manah,” ku iya.

Sama bisi ngulu pengerami nya Direktor PMU Dr Nasir Abu Hassan, Sapit Direktor Pengarah Akademik PMU Abdubrani Yunus, Sapit Direktor Sukung Akademik PMU Rosnee Zainol enggau Pemesai Opis Pelajar Pelilih Menua Mukah Abdul Wahab Sapawi.

Pemangku Kepala Polis Pelilih Menua Mukah ASP Jamil Othman, Sapit Pemesai Bejalaika Pengawa Pelilih Menua Mukah Nolin Gendang Menijar Dewan Suarah Mesra Mukah, American Wayne ti sama bisi ngulu pengerami nya.