3 kes duit lenyau kena cheluk dalam kandang sehari

0

SIBU: Dalam kandang sehari, penusah duit lenyau kena cheluk ari kuchek bisi nyadi tiga kali.

Penusah tu selalu agi nyadi ba pasar besai, baka supermarket, endur mayuh orang besekut bebelika barang sereta suah nuntung ba sida ke indu.

Kemari, penusah tu bisi tiga kali nyadi ba sitak menua tu dalam kandang sehari entara urung pukul 9 ngagai 11 pagi.

Penusah ke terubah nuntung siku indai tuai ke beumur 53 taun ba Jalai Khoo Peng Long.

Nitihka ripot, iya nemu kerepai iya ke ditepu ba beg sandik lenyau benung iya ngirup ba kedai kupi.

Kes kedua mega nyadi ba siku indu beumur 30 taun ke baru nemu kerepai iya ke ngundan duit sepenyampau RM560 lenyau lebuh iya ke bebelika barang di market Sentral ditu.

Nangkanka nya, kes ketiga nyadi ba indu beumur urung 30 taun ke ngeripot duit lebih RM400 lenyau maya iya raun ba sebengkah supermarket ditu.