Ngetu ngeruga runding rayat enti deka ke pemansang, ku Nyalau

0

Projek perintah seruran dipejalaika enti sema nadai penemu nyakal ari mensia mayuh

LUBOK ANTU: Raban orang ke ngelaban perintah Barisan Nasional (BN) patut ngetu ngeruga runding rayat enti sema deka meda projek pemansang digaga perintah BN kelebih agi ba pelilih menua Lubok Antu nya majak dipejalaika.

Kaban Parlimen Lubok Antu William Nyalau anak Badak, madahka raban nya ti bejaku ngagai rayat ngumbai pemansang nadai diatur ba menua nya semina bejaku bejaika perintah aja lalu ngemai rayat enda nyukung perintah BN.

“Ngiri runding rayat enggau rachun sereta mantaika jaku ti enda betul nya pengawa ke enda manah. Sida ke bejaku ngejaika perintah semina deka ngerebut kuasa aja tang ukai meri pemansang sereta nyaga pengidup rayat ke bendar,” ku iya.

Nyalau bejaku munyi nya lebuhka diasuh bejaku ngulu Program Begulai enggau Rayat ke diatur ba RPI Rumah Anyang, Nyemungan Panjai dalam pelilih menua Lubok Antu apin lama tu tadi.

Ba pengawa nya, Nyalau nyuaka cek Projek Mit Menua Pesisir (MRP) RM45,000 ngagai RPI Rumah  Abil Lawang, Tinting Lalang.

Kelimpah ari nya, Nyalau mega ngelalau bala graduate enda ibuh kelalu kiruh ba pengawa politik lebuhka udah tembu belajar.

Sida iya (pelajar) patut ngiga pengawa ke patut nyerumba enggau pengelandik ti dikembuan sida, enda ngira ngiga pengawa ba sektor swasta tauka pengawa ba perintah, ku iya nerangka enggau silik.

“Nya alai aku ngelalau bala graduate enda ibuh enggau orang ba pengawa politik ke angat laban nya ulih ngerusak pengidup kita dudi hari,” ku iya.

Sama bisi datai ngulu pengerami nya Pemesai Opis Hal Ehwal Khas (JASA) Parlimen P.203 Lubok Antu, Jeoffery Baja anak Ricky Maba, orang ke gawa ba perintah sereta tuai raban bansa.