KUCHING: Opis Menteri Rampa Menua enggau Pengerai Mensia Mayuh (KASKA) tulihka tiga bengkah perais beserimbai enggau konvensyen Kumpulan Kreatif enggau Inovatif (ICC) bekau ti udah mujur ngemansangka sistem ripot baru enggau lengkas (ReDDS) sereta ulih ngurangka timpuh jam sereta kos nyendiaka ripot iya nya ngena ungkus RM28,808 sereta ngemandakka ngagai 139 jam.
Perais ke diterima iya nya ‘3 Stars Gold Award’ ba pengawa Konvensyen ICC renggat menua ke diatur MPC berengkah ari 7 ngagai 9 Oktober 2010; teulihka “Gold Award” ba Konvensyen ICC Sarawak & Sabah ke diatur MPC kena 5 enggau 6 Julai 2010 tu suba.
Kelimpah ari nya, opis tu mega tulihka lumor dua ba kategori pengatur pengawa (Pengurusan) ba pengawa Konvensyen KIK diatur Opis Kepala Menteri kena 7 ngagai 9 Julai 2010.
Dr Penguang Manggil ti nyadi Sekretari Mendam Opis Menteri Rampa Menua enggau Pengerai Mensia Mayuh nyuaka semua perais nya ngagai Menteri Rampa Menua enggau Pengerai Mensia Mayuh, Dato Sri Wong Soon Koh.
Pengawa ti diatur enggau rumpas sepengudah nyuaka geran Projek Kecil Luar Bandar (MRP) enggau penyampau RM165,000 ngagai 26 bengkah gerempung ke ukai dikuasa perintah, ditu kemari.
Nitihka penerang Dr Penguang, projek ti diberi nama Projek ngurangka timpuh nyendiaka belanja pemansang menua ba ripot suku taun ari 144 jam ngagai 5 jam.
Projek nya dipejalaika sepengelama tiga bulan ulih raban D.A.N.I (Dinamik, Aktif, Nekad, Inovatif).
Tuju projek nya diatur ngambika ulih ngurangka timpuh nyendiaka ripot ngagai 90 persin, ngurangka penyuah ngaga penyalah maya nyendiaka ripot ngagai 90 persin, enggau dikena ngurangka kos nyendiaka ripot.
“Pemutus projek tu iya nya udah ngurangka timpuh nyendiaka ripot ari 139 jam ngagai 5 jam, ngurangka penyuah ngaga penyalah maya nyendiaka ripot ari 74 ngagai 14 sereta mujur ngurangka kos belanja nyendiaka ripot ari RM85.00 ngagai RM8.50,” ku iya.
Ba pengawa ke sebaka Dr Penguang nyuaka bup ‘Pelan Strategik dan Latihan” kena ngemansangka modal mensia ba semua opis orang ke bekuasa di menua tu.