KUCHING: Graduate ti tembu belajar ngambi kursus pengajar ba Institut Pendidikan Guru (IPG) diansak ngajar di menua pesisir.
ALFRED JABU NUMPANG
Sapit Kepala Menteri, Datuk Patinggi Tan Sri Alfred Jabu Numpang madah, nembiak di menua pesisir begunaka pengajar ti lebih dedikasi.
“Kita patut milih sereta ngemeratka pelajar nembiak di menua pesisir sereta kandang menua ke bedau mansang enggau maju, laban pengawa pengajar endang ngambi berat pasal semua orang,” ku iya sepengudah bejadika Konsert Malam Muzikal 2010 ti ngena rambai jaku ‘Heroes’ enggau pengawa numbuhka bekau alumni IPG Batu Lintang kemari.
Ku iya bejaku baru, pengajar patut ngemeranka teori DIDIK (Dedicated, Intelligent, Dicipline, Intergrity and Knowledge) ngambika ulih nempa nembiak rebak baru ti bekualiti enggau bepenemu.
Iya mega muji pengajar ti ngena teori DIDIK maya ngajar kena ngulihka juluk ati ba taun 2020, kelimpah ari ngadaka mayuh agi pengajar ti ngemeranka ba IPG Batu Lintang.
Ba pengawa ke sebaka, iya nyuaka ungkup belanja RM20,000 ngagai IPG Batu Lintang.
Jabu ti mega bekau alumni IPG Batu Lintang muji raban keterubah ti bisi 58 iku graduate Ijazah Sarjana Muda Perguruan ke ngambi pelajar Matematik, Bahasa Melayu, enggau Bahasa Cina kemari.
Bisi 80 iku nyengkaum nembiak enggau pengereja pengawa IPG Batu Lintang ngemujurka pemerindang malam muzikal ti nyadi pengerami ninting taun.
Ku iya, alumni ti ditumbuhka mega ulih meri peluang ngagai bala bekau alumni terus meri sukung ngagai IPG Batu Lintang.
Bisi sama datai ngulu pengawa nya, Rektor IPG Opis Menteri Pelajar Malaysia (KPM) Datuk Dr Haili Dolhan, Sapit Tuai Direktor Pengawa Pelajar Dato Dr Asariah Mior Shahrudin, Direktor IPG Batu Lintang Abdillah Adam enggau Koreografi (pensyarah) IPG Lee Gim Keit.