Rayat menua pesisir majak mayuh nadai dokumen pengelala diri, ku Entulu
KUCHING: Opis Menteri Dalam Menua (KDN) patut berunding ngubah Genteran Tusun Ukum (GTU) Opis Pengerijister Bansa (JPN) ngaga siti atur ke ulih netapka pansik DNA dikena ba siku-siku orang kelebih agi ba sida ke laun ngerijister surat beranak tauka lebuh ngaga kad pengelala.
NADAI NGEMBUAN SURAT BERANAK ENGGAU TINGKI: Nawah (tiga kanan) enggau anak iya Mattious (dua kiba), ke sama nadai ngembuan sebarang dokumen begambar enggau inik Mattious, Lawi (dua kanan) apai tiri Mattious, Ali Kieu, enggau Entulu (tiga kiba).
Sapit Menteri Pemansang Menua Pesisir enggau Kandang Menua, Datuk Joseph Entulu Belaun madahka baka tu lebuh ngatur aum media begulai enggau Mattious Nawah (anak), 20, Nawah Merejok (indai), 38, Lawi Nabong (ini), 60, enggau Ali Kieu (apai tiri Mattious) ari sitak Tamin ba lobi Hotel Pullman ditu, kemari.
Mattious enggau Nawah sama nadai ngembuan surat beranak enggau kad pengelala ketegal enda ulih ngeluarka sekeda dokumen bukai lebuh dipinta ari sida maya ngaga dokumen tu.
Nitih ku Nawah, kebuah iya baka nya laban tiap kali sida iya deka ngaga dokumen tu sida iya ditanya opis JPN pasal penunga apai Mattious ke ulih nyadi saksi lebuh ngaga dokumen tu tang Nawah madahka iya enda nemu penunga rambang(apai ada Mattious) iya nya suba.
“KDN patut ngerunding ngubah Genteran Tusun Ukum (GTU) Opis Pengerijister Bansa ngambika pansik DNA ulih dikena lebuh sida ke deka ngaga kad pengelala tauka surat peranak ulih ditetapka, kelebih agi sida ke bisi penanggul ngaga dokumen tu baka sida ke diau ba menua pesisir enggau ba ulu entigis,” ku Entulu.
Iya madahka laban pekara tu suah nyadi, nya alai ku iya, opis JPN dilalau ngemutarka pekara tu enggau naka penyampat ke lebih agi ngubah sekeda ari atur ba KDN ngambika orang ari menua tu empu (Sarawak) ke sigi amat asal menua tu tang nadai ngembuan sebarang dokumen ketegal penanggul ke baka nya, ulih diberi kad pengelala enggau surat peranak sida iya.
“Aku semina ulih minta ngagai KDN lalu mantai ngagai sida penanggul ke ditapi raban bansa kitai ke diau mendam di menua pesisir enggau ulu entigis,kelebih agi ba rayat aku ke diau ba Selangau, taja pan sida tu endang amat diada ba menua tu tang laban nadai penemu enggau pengelandik ke lebih agi pemar mindah ketegal ke suntuk perengkaguna, ngujungka empelita sereta enda ngemeratka pemesai guna dokumen tu,” ku iya.
Mattious ke nadai ngembuan sebarang dokumen lalu sama mega enggau indai iya Nawah, ke enda ulih ditetapka nyadi peranak menua, laban nadai ngembuan sebarang dokumen tetap nyengkaum nadai setipikit ari sekula laban indai iya endang nadai kala besekula, enggau sida sebilik diatu diau ba RPI, Rumah Nyawin Judi, Batu 36, Jalai Sibu-Bintulu.
Tang taja pia, indai Nawah, Lawi bisi kad pengelala iya empu ke diayanka iya ngagai pemberita ba aum media nya.
Sebedau nya, Entulu madahka Mattious besekula naka primari 6 aja ba SK Nanga Yong Kapit, lalu berindik ari penanggul ke nadai surat peranak tauka kad pengelala, iya lalu ngetu besekula. Sida menyanak udah nya pindah ngagai Tamin ari Kapit lebih 20 taun tu ke udah.
Iya madah Mattious mega napi penanggul kena tangkap polis maya gawa ngaga rumah ba Sungai Maong bulan Ogos tu tadi ketegal nadai ngembuan sebarang dokumen lalu dikumbai orang Indonesia gawa ba palan nya, tang iya dilepaska laban bisi tanda bekau tuchuk BCG ba lengan kiba.
“Bakani ku ngumbai iya orang Indonesia? Enti sema orang Indonesia bejaku Iban, entak jaku sida pan enda sebaka,” ku Entulu.
Ba menua tu, betuchuk BCG deka diberi ngagai nembiak mit ke baru ada ba semua klinik tauka ba sepital menua tu.
Naka kediatu, ba sitak Tamin aja, bisi urung 400 iku mensia ke diau ba sitak nya nadai surat peranak tauka kad pengelala.
“Nya kadang-kadang ngujungka sida iya enda ditemu sekalika sida peranak menua tu tauka menua bukai laban nadai ngembuan sebarang dokumen ke ulih nyukung peminta sida iya.
“Tu penanggul ke balat besai sekalika nya ba pengawa sekula, maya bepintaka pengawa tauka lebuh ti deka bejalai nujah menua ketegal ke nadai ngembuan sebarang dokumen. Nadai pengawa ulih dikereja sida, indah bekuli pan begunaka kad pengelala. Nya alai enti KDN enda mutarka penanggul tu enggau jampat, dia deh penyampau rayat menua tu ke ‘ukai rayat menua’ majak mayuh laban sida majak betelesak,” ku Entulu madahka pengirau iya.