Tuesday, September 29

Jalai besai Pan Borneo mit sereta enda likun

0

SARIKEI: Jalan besai ke udah digaga sepemanjai menua tu ari Lawas nyentuk ke Kuching, ti mega dikumbai Jalai Pan Borneo, dipelabaka sebengkah ari jalai ke pemadu mit sereta enda likun enti dibandingka enggau jalai-jalai besai ba menua bukai di serata Malaysia.

Kaban Parlimen (MP)Sarikei Ding Kuong Hiing madahka, Opis Kereja Raya (JKR) diatu benung dalam proses ngemetulka tiku jalai ke tajam taja pan apin nyapai ‘status highway’.

“Kita ngarapka raban ari opis menteri nya ngaga pemutus ke patut lalu berunding sereta ngatur enggau lengkas pekara tu ngambika mensia mayuh ke betengahka jalai alun nya seruran likun sereta enda napi pemar.

“Kelimpah ari ti ngemanahka sepemanjai jalai alun, iya mega dipelabaka tau mai penguntung sereta nyungkak penatai pemisi ke tinggi ke ulih ngerembaika ekonomi menua Sarawak kelebih agi ba sitak zon tengah enggau kandang menua Tanjung Manis ke nyadi ‘hab halal’ sereta pemansang kandang SCORE ti nyadi pun agenda nasional.

“Kelimpah ari nya aku meri besai terima kasih ngagai Opis Menteri Kereja Raya Malaysia laban udah merambu program pengawa  ngemanahka jalai ari Bukit Huang-Sekumang, Sarikei nyentukka Tanjung Manis ba Atur Pemansang Malaysia Lumpar Ke-10 (RMK-10).

“Tang aku bisi mega dipadahka Opis Menteri Besai, langgur projek nya bedau dipasukka dalam pelin ke terubah dalam RMK-10 taja pan udah diperambuka Opis Menteri Kereja Raya.

“Enggau nya, aku ngarapka raban ari Opis Menteri Besai ke lebih agi Unit Perambu Ekonomi (EPU) ulih berundingka baru sereta merambuka program pemansang nya ba  pelin ke terubah laban pengawa ngemanahka tu beguna amat ngambika ulih ngerembaika bidang ekonomi ngagai genturung menua nya,” ku Ding.

Ding bejaku munyi nya, lebuh ti bejuraika Bajet 2011 ba Sidang  Parlimen ti benung diatur diatu.

Nunda ku Ding baru, pengawa ngemanahka Jalai ba Bukit Huang-Sekumang beguna amat ngambika ulih nyungkak pemansang ekonomi ba sitak  zon tengah menua Sarawak nyengkaum Sri Aman, Engkilili, Betong, Spaoh, Saratok, Pakan enggau Julau.

“Pengawa ngemanahka jalai tu mega ulih ngemujurka agenda perintah ke deka ngelakuka zon ‘hab halal’ ba kandang menua tu sereta kandang SCORE ba Zon Tengah Sarawak.

Berebak enggau nya,Ding mega minta Opis Menteri nya berundingka program pemansang ke lebih agi nyediaka jalai alun ke manah sereta likun ditengah ba genturung menua nya.