KUALA LUMPUR: Malaysia udah berengkah bejalaika program ngurangka pengawa ngemansutka asap nyentukka ngagai 40 peratus manggai ba taun 2020 baka ti udah diaku Menteri Besai Datuk Seri Najib Tun Razak senentang Sidang Ubah Gaya Hari ba Copenhagen taun siti nyin kemari,sereta negkebang Polisi Menua bekaul enggau Ubah Gaya Hari.
Menteri Pengeraja Asal enggau Rampa Menua Datuk Seri Douglas Uggah Embas madahka, ari baruh program nya perintah mega bisi ngaga siti pelin ti silik sereta mungkur semua kena mutarka isu ubah gaya hari dalam timpuh ti panjai.
“Kena mandangka pemerat ngagai tanggung pengawa nya belama, Palan Kuasa (Pusat Tenaga) Malaysia apin lama tu udah dikarapka baru nyadi Opis Teknologi Gadung Malaysia lalu nya meh siti kelai ari pengawa perintah bebendar deka munaska ubah gaya hari,” ku iya bejaku ba pengerami nutup Sidang Antarabangsa bekaul enggau Ubah Gaya Hari, Standard Betanam Betupi enggau Pengawa Dagang ba Kuala Lumpur kemari.
Teks jaku iya nya dibacha Sapit Kepala Sekretari I Opis Menteri Datuk Aziyah Aziyah Mohamed.
Lebih 150 iku pakar, tuai akademik sereta ijinsi antarabangsa bisi ngambi bagi ba pengawa sidang dua hari ti diatur begulai enggau Pengawa Sidang Gerempung Bangsa-bangsa Bersatu Bekaul enggau Pengawa Dagang sereta Pemansang (UNCTAD) sereta mega Gerempung Pemansik enggau Nguruska Rampa Menua Malaysia (ENSEARCH).
Douglas madahka perintah mega benung ba proses deka bejalaika siti projek ibuhka rampa menua ari baruh Chara Pemansang Beresi (CDM).
“Naka ke diatu Malaysia udah ngerejister 81 iti projek enggau sekretariat CDM ba Bonn, Jereman.
“Nya alai enggau temegah ati aku deka madahka menua Malaysia diatu ba lumur ke lima dalam dunya, ari segi ngerejisterka projek-projek CDM,” ku iya.
Ba baruh atur pemansang Malaysia Lumpar Ke-sembilan, ku iya perintah udah beratika guna Kuasa Tau Dikena Baru (RE) nyadika pelasar nyungkak ekonomi ti tegap,kelimpah ari ti beratka Penyikar Kuasa (EE) ba pengawa bekena enggau ngemansutka kuasa.
Sama bela datai enggau ngulu pengawa nya Ketuai Pemansang Pengawa Dagang UNCTAD, Dr Ulrich Hoffman enggau Presiden ENSEARCH, Abdul Aziz Long. — Bernama