BN anang kelalu jampat lantang ati

0

KUALA LUMPUR: Barisan Nasional (BN) anang kelalu jampat lantang ati enggau pemujur ba pengawa bepilih mit Parlimen Batu Sapi enggau Kunsil Nengeri (DUN) Galas kemari,tang majak gawa belama ngambika pemujur ti baka nya ulih dijapai ba pengawa bepilih besai renggat ke-13 ila.

Sapit Menteri Besai Tan Sri Muhyiddin Yassin madahka, taja pan pemujur nya bis ngayanka ubah ti manah ngagai BN kelebih agi nyauka manggai ba pengawa bepilih renggat ke-13, tang kita enda tau lelenga ngapa.

Muhyiddin ke lalu nyadi Sapit Chairman BN bejaku munyi nya ba pengerami ngintu Hari Deepavali MIC ba Pusat Dagangan Dunia Putra lebuh ti dipinta ngenang pengawa BN nyediaka diri napi pengawa bepilih renggat ke-13 sepengudah menang ba dua iti palan nya kemari.

BN mujur ngerampas penuduk DUN Galas ba Kelantan enggau majoriti undi 1,190 sereta ngetanka penuduk ba Parlimen Batu Sapi, Sabah enggau majoriti ke besai iya nya 6,369 iti undi.

Ngenang penyampau majoriti ti besai diulih BN, Muhyiddin madahka nya siti ari  “ubah ti chukup meransangka”.

“Nya ketegal rayat ulih nerima polisi perintah, pengawa ti dipejalaika Menteri Besai enggau pengawa ti kereja enggau bebendar setaun dua ke udah,” ku iya.

Taja pia, ubah nya siti singkang ti manah sereta enda ulih dipelabaka baka nya belama enti enda gawa bebendar agi kena nentuka pemujur BN jemah ila lalu enda tau nyadika kelai ke pemujur BN ba pengawa  bepilih ti deka datai ila, ku iya.

Menteri ba opis Menteri Besai Tan Sri Dr Koh Tsu Koon mega madahka pemujur besai ti diulih BN nya siti ari chara rayat udah nyukung batang penemu 1Malaysia ti dinengkebang Menteri Besai Datuk Seri Najib Tun Razak.

Ngenang  sukung ari raban bansa Cina ba kededua sitak nya, Datuk Seri Liow Tiong Lai ke nyadi Sapit Presiden MCA madahka raban bansa nya diatu majak arap ati ka BN.

Menteri Orang Gawa Dr S.Subramaniam ke lalu nyadi Mandal Presiden MIC mega madahka pemujur BN ba kededua pengawa bepilih mit nya mandangka rayat diatu belabuh nerima polisi 1Malaysia ke lalu nyadi pelasar politik ba menua tu. — Bernama