Berita madah badu mangku pengawa semina bula aja

0

KUCHING: Parti Progresif Demokratik Sarawak (SPDP) kemari madahka berita pasal Sekretari Besai parti nya, Nelson Balang Rining udah ngelengka ke pengawa iya ba parti semina jaku sebubu aja.

Siku ari pemesai parti Paul Igai madahka jaku sebubu nya ukai berita ke amat laban parti nya nadai nerima sebarang surat badu ari pengawa parti ari Balang.

Berindik ari tu, Balang agi mengkang megai pengawa nyadi sekretari besai parti nya.

“Giga meh pemendar berita nya. Aku nadai nerima sebarang surat badu ari pengawa parti…Nadai agi isu nya. Aku pan enda nemu pasal pekara tu. Aku nadai ninga rita, nadai meda, tang aku bisi ‘nyium bau’ ba pekara ke enda manah,” ku iya madah lebuh ditelefon kemari.

Igai ti mega nyadi Sapit Sekretari Besai SPDP, lebuh ditanya pasal timbal iya bekaul enggau berita ba internet ti madahka Balang badu agi megai pengawa Sekretari Besai parti nya.

Nelson ti mega nyadi ADUN Ba’ Kelalan dipadu megai pengawa nya ba bulan Januari taun tu tadi nganti Menteri Muda Bekal AI ti mega nyadi ADUN Marudi Sylvester Entrie Muran.

Ketegal pekara tu ke ngujungka Entri enggau empat iku pengari rayat ke bukai iya nya ADUN Tasik Biru Datuk Peter Nansian, ADUN Bekenu Rosey Yunus, ADUN Batu Danau Paulus Palu Gumbang enggau Kaban Parlimen (MP) Mas Gading Datuk Dr Tiki Lafe enda lantang ati.

Gempung sida tu dikelala enggau nama 5 iku gempung SPDP, lalu bisi mega maya nya sida iya ngansak ngasuh parti nya (SPDP) begempung enggau Parti Rakyat Sarawak (PRS) lalu sekeda mega bisi bekaul rat enggau pemesai PRS.

Tang taja pia, sepengelama tu ke udah, sida iya dipeda nyau bisi bekaul manah enggau Mawan ba sekeda atur pengawa perintah ke dipadah nadai agi penyarut dalam parti nya.

Nitihka ripot ari internet, berita ke madah berapa minggu tu ke udah Nelson bisi besebana ngagai bala pangan iya madahka iya deka badu ari megai pengawa parti nyadi Sekretari Besai.

Iya bisi nyebut ngagai bala pangan iya madahka iya agi kelalu biak megai pengawa besai ke diungkup ke iya lalu ngasaika pengawa ke dipadu nya udah ngasuh parti nya charut.

Tang taja pia, datai kediatu Nelson enggai nimbal sebarang tanya nya.

SPDP ke ditumbuhka ba taun 2002, diungkupka lapan buah penuduk menua iya nya Tasik Biru, Krian, Pakan, Meluan, Bekenu, Marudi, Batu Danau enggau Ba’ Kelalan ba baruh pegai atur penuduk Barisan Nasional (BN).

Enggau ungkup nya mega, sida iya ngembuan empat buah penuduk parlimen iya nya Mas Gading, Saratok, Baram enggau Bintulu.