SRI AMAN: Rayat seruran dipinta meri sukung enda bechiping ati ngagai perintah ti dipegai perintah Barisan Nasional (BN) awakka ulih bejalaika projek pemansang ba menua tu.
Menteri Muda Pemansang Tanah Datuk Francis Harden Hollis madahka perintah bebendar begunaka sukung ari rayat laban enti rayat enda beserakup ati nyukung perintah ke bisi diatu pekara ke baka nya semina ngemediska perintah meri projek pemansang ba siti- siti endur.
Ulah ke baka nya mega semina ngelaun sereta ngemuntanka pemansang ti udah diperambu, ku iya.
“Rayat patut landik milih tuai ti ulih ngemansangka rayat lalu enda ngira sekalika ba kandang mengeri tauka ba menua pesisir.
“Aku nemu, rayat dekaka pemansang belama … nya alai sukung ti tegap ngagai perintah siti ari pemilih ti pemadu manah kena ngemujurka pemansang ba menua tu,” ku iya.
Harden ke lalu nyadi Kaban Kunsil Nengeri Simanggang bejaku munyi nya lebuh ti ngulu program nyanyat chapi beserimbai enggau Hari Raya Korban ba Masjid Darul Syakirin, Kampung Muhibbah ditu ensanus.
Ku iya, kerejasama ti rat enda ngira bansa enggau penatai ba mensia mayuh sereta entara perintah enggau rayat ngemudahka agi perintah ngelanggur sereta ngatur pemansang awakka kitai enda majak tingal ba belakang.
Berebak enggau nya, Harden sama mai rayat nyeliahka jaku petenah ari raban penyakal laban nya semina siti ari chara sida kena ngulihka undi penyinu ngambika rayat nyukung sida.
“Kitai semua sama ulih meda, rayat enda mudah dikemula nengah chara ke baka nya lalu rayat mega udah nemu beratika pekara ti manah enggau jai.
“Pemujur chalun BN menang ba pengawa bepilih mit Galas enggau Batu Sapi apin lama ti udah nyadi kelai ke manah mandangka BN terus dipilih sereta seruran ba ati rayat,” ku iya.
Beserimbai enggau nya, taun tu, iya udah meri dua iku chapi ngagai semilan JKKK bansa Melayu ba DUN Simanggang lalu dagin chapi nya deka diagihka ngagai lebih kurang 400 iti ruang bilik ti bepengarap Islam ari gerempung sembilan JKKK nya.
Sama bela ngulu pengerami nya Pengulu Abdul Samad Abdul Rahim, bala tuai kampung ari gerempung semilan JKKK, bala ketuai opis sereta bala ketuai raban bansa ari endur bukai.