BAU: Sapit Menteri Dagang Temuai Malaysia Dato Dr. James Dawos Mamit madahka rayat menua tu enda patut nyalahka pengari sida enti nyema projek pemansang ti udah disemaya sereta dikemendarka perintah bedau dipejalaika, kelebih agi projek di menua pesisir.
Iya madahka, projek ke diberi perintah endang udah dikemendarka perintah besai kelebih agi projek mit menua pesisir (MRP) ke beungkus enda lebih ari RM200,000 (RM200 ribu).
Tang ku Dawos, projek nya dipejalaika Opis Residen enggau Opis Pelilih Menua sepengudah dikemendarka bejalaika pengawa ari Opis Pemansang Menua nyengkaum kuasa meri waran.
Ngenang projek pemansang ba sitak ke dipegai iya Dawos madahka diri enda lantang ati ketegal sekeda projek pemansang ke udah diperambu ba sitak Mambong bedau dipejalaika nengah opis pelilih menua.
“Duit ke udah diungkupka perintah besai kena ngatur projek pemansang endang bisi tang geran enda mujur dikenataika ngagai rayat.
“Aku arap bendar semua projek pemansang ke udah diperambu dipejalaika enggau mujur bepelasarka rambai jaku rayat dikemeratka,pemujur diseridi,” ku iya.
Dawos ke mega kaban parlimen (MP)Mambong mansutka sebana iya lebuh dikerandau pengarang berita sepengudah pengawa nyerahka enam iku chapi nyerumba pengerami Hari Raya Aidil Adha ke diintu ba Kampung Lidah Tanah, ditu kemari.
Lebuhka ngenang sekeda projek pemansang ke enda ulih dipejalaika dalam sitak iya, Dawos madahka Opis Menteri Pemansang Menua Pesisir enggau Kandang Nengeri udah ngemendarka geran pemansang ba pun taun tu tadi tang naka ke diatu sekeda projek nya meruan bedau dipejalaika.
Nitih ku iya, enti ungkup duit projek enda ulih dipejalaika ba pengujung bulan Disember dia duit nya deka ditikalka baru, lalu pekara baka tu ngerugi sereta ngujungka penanggul ke berat ditapi rayat.
“Sekeda projek ke bedau dipejalaika taja udah dikemendarka bulan Mac iya nya baka projek jalai kampung, balai aum enggau kebukai,” ku iya.
Dulu ari nya lebuhka bejaku iya madahka kena nentuka projek dipejalaika nitihka timpuh ditetapka, atur tauka chara ke baru patut dipejalaika iya nya ngemendarka projek nengah opis pengari rayat.
“Dalam aum parlimen minggu baru, aku deka mansutka penemu sereta berandau enggau bala menteri bekaul pejalai pemansang nengah opis pengari rayat tu ngambika projek ti dipejalaika bisi kualiti,” ku iya nandu pekara tu lebuh berandau enggau pengarang berita.
Bisi ngulu pengawa nya kemari Tuai Zon Kranji Parti PBB ti mega Taui Ranting PBB Siniawan Baru Lui@Alwi Bol,Sapit Chairaman JKKK Kpg Lidah Tanah ke mega nyadi Chairman Pengatur Pengawa 2010 Hamzah Bujang enggau kebukai.