MIRI: Opis Kunsil Pengelikun Jalai Alun (MKJR) pelilih menua Miri kemari minta Opis Perengka Pengangkut (JPJ) bejalaika atur ngena Sistem Penguatkuasaan Automatik (AES) nyadika sebengkah ari chara ngajar mensia mayuh ti betengahka jalai alun ngambika seruran nitihka atur ke udah ditetapka.
Menteri Muda Penyambung ke lalu nyadi Menteri Muda Lumba enggau Main Datuk Lee Kim Shin madahka ngena AES, sekeda penyalah trafik ti dikereja orang ti bekenaka jalai alun ulih dirikod ngena kamera ti diengkahka ba siti – siti endur ti udah ditetapka.
“Genap iti penyalah trafik ti dikereja orang ti nengah jalai alun kelebih agi penyalah ti mai kerita kelalu laju sereta ngelaban api trafik mirah deka dirikod lalu diukum tekala nya deka dikeluarka JPJ ngagai orang ti salah nya,” ku iya.
Nya alai ku iya, pengawa bejalaika sistem nya ila ulih ngajar orang ti bekenaka jalai alun nundaka atur jalai alun ke bisi diatu tauka diukum.
Lee ke lalu nyadi Mandal Chairman Opis Pengelikun Jalai Alun Sarawak bejaku munyi nya lebuh ngaga aum enggau media sepengudah ngulu aum Opis Kunsil Pengelikun Jalai Alun Pelilih Menua Miri (MKJRBM) ba Opis Residen ditu lemai kemari.
Kena ngemujurka juluk nya ku iya, siti komiti teknikal deka ditumbuhka kena mansik langgur bejalaika sistem nya.
“Pekara nya nyengkaum ngaga keretas langgur penudi endar sebedau dianjung ngagai sekeda ijinsi ke bekaul ,” ku iya.
Berebak enggau nya ku Lee, kaban komiti teknikal nya deka diarika pengari ari sekeda ijinsi perintah baka Opis Residen, JPJ, Opis Kereja Raya (JKR), Majlis Bandaraya Miri (MBM) enggau polis trafik.
Nandu nya baru ku iya, ba aum ti udah, raban MKJRBM mega merambu deka ngelekatka kamera nya ba enam iti endur ke manah ba pelilih menua Miri.
Enam iti endur nya nyengkaum ba Jalai Pujut, Jalan Lutong, Jalai Airport, Jalai Miri-Bintulu, Jalai Kuala Baram-IKBN enggau Jalai Petisir Pantai.
“Taja pia, langgur deka ngelekatka kamera ba enam iti endur nya deka dipansik baru sebedau pengawa bekenaka SPA dipejalaika ba pelilih menua tu,” ku iya sereta madahka kamera nya ulih ngerikod jam enggau palan alai pekara nya nyadi sereta ulih macha tikas pengelaju kerita lebuh ti ngereja penyalah nya. Penerang orang ti bempuka kerita nya deka ditemu ari lumur kerita nya.
Nyerumba nya ku Lee, kenaka 20 haribulan Disember tu ila Kimpin Pengelikun Jalai Alun deka diatur beserimbai enggau pengerami ngintu Hari Krismas taun tu.
Kimpin nya deka berengkah ari pukul 8.30 pagi sereta deka diatur ba Jalai Miri-Airport enda jauh ari JPJ Miri.
Beserimbai enggau kimpin nya, sekeda surat penerang enggau pelekat pengelikun deka disadung ngagai mensia mayuh ti mansa endur nya.
Sama bisi enggau ba aum nya Residen Miri Antonio Kahti Galis.