MIRI: ‘Mimbar Permuakatan Ibu Bapa Malaysia’ (MAPIM) Sarawak minta mayuh agi gerempung ke ukai dikuasa perintah (NGO) ngatur pengawa tauka program ungkup bala nembiak kelebih agi maya kemisi sekula tu.
Chairman gerempung nya, Wan Zain Syed Modzar madahka pengawa NGO ngatur program nya beguna amat kena nentuka raban nembiak tu enda tepejuh ba pengawa ti enda menyana.
“Gerempung baka Rakan Muda tauka Saberkas Sarawak patut ngatur mayuh agi pengawa ungkup raban nembiak rambau kemisi sekula tu sereta ukai semina ungkup nembiak ti diau ba kandang mengeri tang mega sida ti diau ba menua pesisir,” ku iya bejaku ngagai Utusan Borneo ensanus.
Zain madahka, sekeda nembiak semina masau hari sida nengah pengawa ti enda menuku baka bejalai ngagai palan bebeli barang, lalu bisi mega sekeda sida ngereja pengawa ti enda manah baka beirupka arak, ngisap gam sereta ulah ke bukai.
“Apai indai patut lebuh maya lepa rambau kemisi sekula tu diisi enggau pengawa ti menyana baka nganjung anak sida enggau ba kem baka Kem Musin Panas ti bisi diatur ba menua Eropah,” ku iya.
Ku iya, pun penusah rama ti nyadi ba bala nembiak ketegal apai indai kelalu ngemanjaka bala anak sida dataika enda terundingka pengelantang pendiau sida.
“Apai indai enda patut nejuka bala anak sida sepeneka ati bejegau nyentukka tengah malam laban ari pengawa ke baka nya tau ngepunka penanggul bukai baka beleman enggau sengapa orang,” ku iya.
Berebak enggau nya ku iya, apai indai patut ngiga peluang begulai enggau bala anak sida nyengkaum ngatur pengawa baka raun tauka nemuai ngagai endur ti manah sereta narit ati ba dalam tauka menua tasik.
“Kitai enda nyalahka tulin apai indai tang enti sema sida nyaga ulah anak sida bepun ari rumah, udah tentu penanggul rama ba raban nembiak deka kurang agi,” ku iya.