‘Biro Wanita’ ungkup semua pupu raban bansa, ku Fatimah

0

KUCHING: ‘Biro Wanita’ ukai semina palan kena orang Bumiputera aja tang ulih dikena raban bansa bukai ke deka nguna palan nya ngemansangka program diri sebilik kelebih agi ba pekara ngemeratka raban indu.

BIRO WANITA UNGKUP SEMUA RABAN BANSA: Fatimah betukar pemeri enggau Ma ke nguluka raban gerempung FCCASW (enam kanan) lalu sama diperatika Norjanah (lima kanan).

Menteri ba Opis Kepala Menteri Datin Fatimah Abdullah madah palan Biro Wanita sigi diungkup kena raban indu semua pupu raban bansa nitihka slogan 1Malaysia ke ditempa Menteri Besai Malaysia, ke ngemeratka penyerakup semua pupu raban bansa.

“Semua aktiviti enggau program perintah ke raban indu ba palan tu sigi diungkup kena semua pupu bansa menua tu. Anang ngumbai palan tu kena pupu bansa Bumiputera aja, buai runding ke enda manah ke ngumbai palan tu semina kena orang Bumiputera aja.

“Enti kita deka ngatur program kena ngemansangka raban indu, kita tau nulis surat ngagai kami, enda ngira atur ke besai tauka mit, ngambika kami ulih sama mantu kita,” ku iya madah ba jaku iya lebuh ngelaluka Gerempung Raban Indu Federation of Chang Chuan Sarawak (FCCASW) ba Wisma Wanita ditu, kemari.

Ku Fatimah baru, gerempung ukai perintah (NGO) beempu tanggung pengawa ke berat lebuh ngangkatka pemerat unit diri sebilik tauka komuniti ba siti-siti sitak endur sida iya.

“Biro Wanita baruh pegai opis Kunsil Pemansang Raban Indu enggau Diri Sebilik enggau Opis Kunsil Raban Indu enggau Diri Sebilik beempuka tanggung pengawa ke berat kelebih agi lebuh kitai ngangkatka institusi ruang bilik.

“Biro Wanita ukai semina bediri kediri aja, laban iya mayuh bekaul enggau agensi opis perintah bukai baka Opis Pengelantang Mensia Mayuh (JKMS),” ku iya.

Ba insitusi ruang bilik ku Fatimah, berengkah ari rumah, ari apai indai ke nyadi ke chuan bala anak sida iya.

“Kemaya hari tu mayuh raban indu kitai udah ngulihka pelajar ke manah, lalu nyadi orang ke gawa ngangkatka ekonomi diri sebilik tang siti batang pengawa raban indu ke enda ulih ditukar ganti enggau pemerat bukai, iya nya indu dalam ruang bilik nyadi orang ke gawa, ke bisi ‘career’, nyadi indai sereta nyadi bini orang,” ku iya.

Nya alai ku Fatimah, pengawa ke dipegai raban indu siti tanggung pengawa ke berat lalu ukai semina nyadi orang ke nyukung tuai bilik ngangkatka ekonomi diri sebilik tang nyadi sebengkah ari komuniti ke nyukung ekonomi menua.

“Ba sitak Koridor Kuasa tau Dikena Baru Sarawak ke deka dibuka enda lama, deka nyadi siti sitak koridor ke deka mantu semua rayat menua tu ngulihka penatai pemisi ke tinggi. Tambah mega, sitak nya deka mungkur menua tengah Sarawak.

“Nya alai, kitai enda tau enda sama ampit ngerebut peluang tu ngemanahka agi penatai pemisi kitai, bala anak sereta uchu kitai jemah ila. Kitai enda ulih mantu perintah menua ngulihka penatai pemisi ke tinggi enti bala anak kitai diatu enda ngemeratka pelajar sida iya,” ku iya.

Lebih 100 iku raban ari FCCASW ke bisi datai ari pelilih menua, Kapit, Kanowit, Dalat, Mukah, Sibu, Sarikei enggau Kuching ti diuluka Chairman Gerempung Yong Shi Hua sereta siku ketuai gerempung Cristal Ma Bee Kuan bisi nemuai dua hari dikena nelebaka diri ngagai Kuching belabuh ari kemari dibai ngagai mayuh palan ijinsi perintah ba nengeri tu ngambika ulih meri peneleba ngagai raban gerempung nya.

Sama bisi ngulu atur pengawa nya kemari, Direktor Biro Wanita Norjanah Razali.