SRI AMAN: Menteri Muda Pemansang Betanam Betupi sereta mega Menteri Muda Dagang Temuai enggau Pesaka Tuai, Mong Dagang minta raban Komiti Pemansang enggau Pengelikun Genturung Pendiau (JKKK) ba serata menua tu beratka pengelikun rumah ba genturung pendiau sida ngambika ulih nyeliahka ari penusah angus. Nundaku iya, besai endar reti ngagai mensia mayuh ba sesebuah genturung pendiau ngambika JKKK bekerejasama beratika sebarang penanggul ti tau ngujungka penusah angus. “Nya alai, aku ngarapka sida ti diau ba rumah panjai, genturung pendiau ba kandang nengeri sereta rumah sida ke numpuk kekediri numbuhka Komiti Penyeliah Penusah Angus (KPPA). “Ukai semina nya aja, aku deka ngelalau apai indai ti bisi anak mit ngambika sida beratika ulah anak sida awakka enda bemain enggau machis tauka perengka bukai ti tau ngepunka penusah angus,” ku iya. “Enti sema apai indai ilap beratika pengawa anak sida, pekara ke baka nya ukai semina tau ngemedis anak sida ke bisi ba rumah tang mega penusah bukai ngagai kitai baka penusah angus,” ku iya. Iya ke mega Kaban Kunsil Nengeri (ADUN) Bukit Begunan bejaku munyi nya lebuh ti bejadika Kimpin Nyeliahka Penusah Angus ba Rumah panjai Iban (RPI) Rumah Anyai Ranggai, Entulang Entawa, ditu ensanus. Ku iya, pengawa numbuhka KPPA tu beguna amat laban sida tu ulih berati sereta nyaga nyeliahka penusah angus. Iya mega ngelalau mensia mayuh ngambika minta tulung ari Opis Pengerara Api (Bomba) enggau Penyah Penusah begulai enggau ijinsi perintah ke bukai ngatur mayuh bengkah program sereta latih bekaul enggau chara nyeliahka penusah angus. Nandu nya baru ku iya, pengawa ke meri latih ngagai mensia mayuh bekaul enggau chara nyeliahka penusah angus ulih nagang api ari ti ngangus rumah sida. “Pengawa nirika sebuah rumah begunaka timpuh ti lama, tang rugi amat enti rumah kitai angus laban api, nya alai sebedau penusah ke baka nya nyadi kitai patut bejaga-jaga dulu,” ku iya. Sama bisi datai ngulu pengerami nya Kaban Parlimen Sri Aman Masir Kujat enggau Sapit Direktor Opis Bomba enggau Penyah Penusah Menua Sarawak Abdul Rahman Mohd Jadi. Ba pengerami nya mega, 20 iku raban tuai rumah ari rampa pendiau di Entulang nerima perengka madamka api ari Opis Bomba enggau Penyah Penusah.

MIRI: Pasar mit Beluru ti sepenyauh urung 90 kilometer ari tu ke sunyi enda lama agi deka nyadi rami lebuh nyambut penatai urung 3,000 iku raban mensia ti ngulu Program Begelumu enggau Rayat 1Malaysia kena 10 enggau 11 haribulan Disember tu.

Chairman pengatur pengawa Sylvester Entri Muran madahka mayuh bengkah pengawa ti nyelai sereta jarang diatur ba endur bukai kena ngisi program dua hari nya.

“Entara pengawa ke bisi diatur nyengkaum pekit tanda engkatak enggu pekit nyumpit ti dipelabaka ulih narit ati mensia mayuh,” ku iya bejaku ngagai Bernama ensanus, sepengudah nyadi chairman aum komiti besai program nya ditu.

Ku iya, program nya diatur Opis Menteri Pemadah Penyambung enggau Main Asal bejuluk meransang rayat mandangka konsep 1Malaysia ba pengidup sida.

Entri ke lalu nyadi Menteri Muda Perengka Guna Mensia Mayuh (Bekal Ai) sereta mega Menteri Muda

Pemansang Tanah Sarawak madahka program meri peluang ngagai temuai ari menua luar betemu sereta ngelala agi mensia mayuh ti diau ba genturung menua nya.

Nandu nya baru ku iya, kelimpah ari pengawa baka ngelantang sereta merindang ati, forum bekaul enggau isu kemaya hari tu mega bisi diatur.

Naka ke diatu bala pengari ari Opis Pengerejister Bansa, Opis Bepilih Menua Sarawak, Opis Tanah enggau Survei begulai enggau Sarawak Energy Berhad udah netapka diri nyadi panel ba forum nya, ku iya.

Kelimpah ari nya, siti penerang mega deka diatur sereta diarika urung iya 20 iti ijinsi perintah enggau kompeni, ku iya. — Bernama

Sponsored links