Karang bup ke pemansang rayat, ku Jabu

0

Ulih ngangkatka penyerakup bansa enggau pendiau mensia mayuh nengah chara ngarang

BEJADIKA: Rahman (kiba) ngelancarka lapan iti bup dikeluarka DBP lalu diperatika Termuzi (kanan) ba pengerami nya.

KUCHING: Dewan Bahasa enggau Pustaka mujur ngatur program ‘kolokium Bahasa dan Sastera Pelbagai Kaum’ ngena rambai jaku “1 Malaysia : Rupa dan Jiwa Bahasa dan Sastera di Sarawak” kemari.

Kaban Kunsil Nengeri (ADUN) Pantai Damai Dr. Abdul Rahman Junaidi dipebasa bejadika pengerami nya ba Dewan Bahasa enggau Pustaka (DBP) pampang Sarawak.

Program tu udah ngempuru raban pengarang, raban ti rindu ke leka jaku, orang ti ngemeranka jaku, orang ti bekenaka jaku Melayu, sereta orang ti ngerembaika leka jaku enggau orang ti ukai ngereja pengawa ba perintah.

Sida tu ngarika mayuh bengkah pupu raban bansa ari serata menua Sarawak.

Lebuhka bejaku maya pengerami nya, Abd Rahman madahka bala pengarang tumeh orang ti ngepunka adat jaku, ngerembaika leka jaku lalu mega orang ti ngepunka batang pengawa main enggau adat bansa. Sida tu mega seruran nyadi orang ti meri penemu ti bekaul enggau pengawa ba mensia mayuh.

“Raban pengarang tu patut meri penemu ti bekaul enggau pengawa ba rayat nengah chara ti berani, lalu ngemeratka tanggung pengawa nulis pekara ba pengelemi ti amat bisi nyadi ba mensia mayuh ti ulih ngangkatka penyerakup bansa enggau pendiau sida lalu ulih dibacha sereta diperatika nengah bup,” ku iya bejaku ti ngarika Sapit Kepala Menteri Datuk Patinggi Tan Sri (Dr) Alfred Jabu Anak Numpang.

Iya mega madahka pengawa leka jaku enggau pengerembai leka jaku udah majak mansang ba menua Malaysia lalu jaku Melayu ti nyadi jaku tuku menua dikena ba mayuh bengkah pengawa pengerembai ukai semina ari raban bansa Melayu aja tang mega dikena raban bansa ke bukai kelebih agi ba menua Sarawak tu.

Abd Rahman mega madah, ari bup ti ditulis ari bala sida tu ulih ngemansangka agi asai ati, semengat enggau penemu mensia mayuh ti ngarika bemacham pupu raban bansa. Tu mega ulih mantu ngasilka rayat ti sama bela bebasa ke pangan diri sereta meretika pendiau pengidup ba genap pupu raban bansa ti bisi ba menua Sarawak lalu ngembuan pengelikun baka ti disepi kitai ngelamatu.

Ba pengerami nya, Abd Rahman udah bejadika lapan iti bup ti dikeluarka ari DBP ungkup taun 2010 lalu bup tu dikarang pengarang ari menua Sarawak ti seruran didinga rita ba pengawa ngarang bup.

Entara bala pengarang ti seruran didinga rita ba menua Sarawak iya nya Jong Chian Lai, Datu’ Dr. Adi Badiozaman Tuah, Zainal Abidin Hj. Suhaili (Abizai), Poul Nanggang, Jaya Ramba, Jais Sahok, Dr. Jeniri Amir sereta mayuh agi.

Entara orang ti bisi meri jaku randau ba Kolokium nya iya nya Prof. Emeritus Dato’ Dr. Hajah Asmah, Dr. Jeniri Amir, Dr. Ramzah Dambul, Datu Dr. Adi Badiozaman Tuah, Jong Chian Lai, Janang Ensiring enggau Abdillah SM.

Kolokium leka jaku enggau pengerembai leka jaku tu keterubah iya diatur ba Kuching ba taun 2008 lalu diatur ba Kota Kinabalu ba taun 2009. Program tu setipak enggau juluk 1 Malaysia ti deka mai penyerakup ba genap pupu raban bansa ti bisi pengari ti landik ba pengawa ngarang cherita tauka bup.

Sama bisi ngulu pengerami nya kemari Ketuai Direktor DBP Dato’ Haji Termuzi Haji Abdul Aziz.