Thursday, August 13

Rayat menua pesisir minta servis jalur lebar dikerembaika

0

DEBAK: Mensia mayuh ti diau ba kandang menua pesisir kelebih agi genturung menua Debak enggau Betong minta perintah sereta kompeni penyambung jalur lebar ngerembaika bungkur sistem  nya awakka mensia mayuh ulih bekenaka internet ba endur sida.

“Kami ngarapka perengka guna tu ulih dikerembaika enggau lengkas ngambika kami nyamai sereta ulih bekenaka internet “, ku Mohd Daud, seiku orang ti diau ba genturung pendiau Debak, Betong  betemu enggau pengarang berita ari Utusan Borneo ditu ensanus.

Ku iya, naka ke diatu, perengka guna nya (jalur lebar 3G ) semina ulih dikena ba pasar Betong.

“Kami nemu baka Debak, Spaoh enggau sekeda endur ke bukai ulih bekenaka jalur lebar udah tu lalu kami minta ngagai perintah tauka kompeni penyambung jalur lebar ulih nyediaka perengka nya sereta ngerembaika bungkur ngagai mayuh endur,” ku iya.

Nambahka nya, pengawa nyediaka perengka guna baka WiFi enggau enda bebayar mega patut dikerembaika agi ngambika orang ti kurang bepenatai pemisi ulih nguna servis nya.

“Baka ke dipinta perintah apin lama ti udah, mensia mayuh ti diau ba menua pesisir patut nyingkang ngagai arus ke lebih moden ba dunya siber ngambika sida ngasaika genap iti ubah nya. “Sebedau tu kitai semina ulih macha ba surat berita, ningaka radio sereta meda tv aja, tang ngena jalur lebar genap iti berita ari serata dunya ulih ditemu kitai,” ku iya.

“Baka ke diatu jalur lebar ba dua bengkah endur nya semina ulih dikena nengah Streamyx lalu kami ngarapka enti  jalur lebar nya majak manah perengka nya ulih dikena ba sebarang endur aja,” ku iya.

Nambahka nya, kami endang ngarapka bungkur arus nya ulih dikerembaika agi ngambika mensia mayuh ba menua  pesisir ulih bekenaka  jalur lebar nya udah tu ila.