Thursday, August 13

Filem Iban enda patut ngayanka rumah panjai aja

0

KUCHING: Filem Iban ti deka digaga jemah ila patut kurang agi ngayanka pendiau bansa Iban ba rumah panjai, ku siku direktor filem Iban Monica Jeff.

Berindik ari nya, iya deka ngaga filem baru iya ti dikumbai Aloi enggau Empangup ba mengeri ke besai baka Bintulu, Miri, Kuala Lumpur sereta Melaka.

“Muntang agi disebut, konsep filem Aloi enggau Empangup tu deka ngayanka mayuh macham gaya pengidup mensia.

‘Aram meh kitai ngaga cherita ke baru, enti ngelamatu mayuh filem Iban ngayanka gaya pengidup ba rumah panjai. Lapa enda ke serak tu kitai ngaga cherita ti ngayanka mayuh macham gaya pengidup baka ke cherita filem Indonesia,” ku iya madah ngagai pengarang berita nengah e-mail.

Aloi enggau Empangup, siti projek ari BFG Media enggau Entertainment Productions keterubah iya disadang deka digaga nyadi cherita drama Iban ti besambung.

Monita ti mega raban ari Film Directors Association Malaysia (FDAM)-bisi penemu nyadi direktor, madahka kebuah iya nukar projek tu nyadi projek ngaga filem laban deka napi peminta mensia mayuh ti rindu agi meda filem.

“‘Aku enda madah kitai enda ngaga filem tu nengah format DVD/VCD. Kitai sigi deka ngaga filem tu nengah format nya tang naka ka diatu kitai deka bekenaka awak ari ulah mensia mayuh kelebih agi bansa Dayak ti majak rindu ngenataika diri ngagai panggung wayang, tu meh tanda ti manah.

“Nya meh kebuah Aloi enggau Empangup deka diayanka ba panggung wayang dulu, format DVD/VCD dudi ila,”ku Monita.

Nitihka penerang ti dipansutka, Monita bedau lama tu tadi udah betemu enggau National Film Development Corporation (FINAS) Direktor General Mohd Mahyidin Mustakim lalu maya nya seduai iya berandau senentang ngeluarka filem Iban.

“Mohd madahka kompeni aku patut ngaga filem begulai enggau opis iya ngambika nyamai sida iya meri bantu lalu iya madahka filem Iban deka diberi basa sereta kelai ari FINAS,”ku Monita.

Senentang pekara bukai, penerang berita udah madahka pengawa begiga ka bala pelakun lelaki enggau indu filem Aloi enggau Empangup ti sepatut iya diatur kena 18 Disember udah dilanjarka ngagai bulan Januari.

Kebuah tu nyadi laban pengawa sida iya ti deka ngangkatka cherita tu nyadi filem ti deka diayanka ba panggung wayang.

Penerang berita mega madah BFG deka ngaga dokumentari Iban ti digelar ‘Bejalai’ nengah format DVD/VCD.

Monita ke nyadi ‘co-direktor’ projek nya, Benny Zachariah (co-direktor/pengeluar), Gumba Amba (Production Manager), Timothy Rayang (Tukang gambar) enggau Mike Kilat(co-host).

Bala sida iya benung bejalai ngagai menua Melaka, Kuala Lumpur, Putra jaya, Johor, Port Dickson enggau Cameron Highland berengkah ari 18 Disember nyentukka 31 Disember ngaga filem.