Konsep 1M’sia engkeman dipeda maya pengerami

0

Nyata mandangka pengering penyerakup mensia mayuh enda ngira bansa enggau jalai pengarap

SARATOK: Pemanah sereta pengasi konsep 1Malaysia ba menua tu ulih dipeda ari pengelantang enggau pengelikun ba sesebengkah pengerami ti diintu. Menteri Muda Betanam Betupi Moden (Koperasi enggau Gerempung Betanam Betupi) Sarawak, Datuk Peter Nyarok madahka, pengering penyerakup mensia mayuh enda ngira bansa enggau jalai pengarap ba menua tu.

“Nya alai sigi besai bendar reti enti kitai bekerejasama sereta mereti begulai enggau pangan diri,ngambika penge­lantang seruran ulih diasaika kitai belama.

“Enggau pengelikun ke bisi diatu, kitai ulih mindah ngagai sebarang endur sereta nadai irau ati.

“Kitai patut beterima kasih laban menua kitai likun, ket­egal pengawa ngiring menua enggau ke berurun sereta diperambu enggau manah ulih perintah Barisan Nasional (BN),” ku Nyarok.

Iya bejaku munyi nya lebuh bejadika pengerami ‘Malam Main Asal enggau Pesta Ai Batang Krian’, Saratok ba mua stesyen bas Saratok kena malam hari empat minggu nyin kemari.

Ku Nyarok, nengah pen­gawa mandangka main asal ari mensia mayuh ti diau ngelingi Saratok, sida ti datai ngulu pengerami nya meretika gaya pengidup mensia mayuh ti nguan menua nya.

“Kelimpah ari nya, baka ti dipeda kitai ba pengawa man­dangka main asal nya, mayuh nembiak rebak baru enggau ngambi bagi ba pengaw nya.

“Sigi nyadi juluk kitai deka meda nembiak rebak baru ngatur program nya sereta enggau ba pengawa mandan­gka main asal ngambika kitai ulih nanam sereta ngerembaika pengawa bekaul enggau main asal tu ba nembiak rebak baru awakka pengawa nya enda lenyau ngapa jemah ila,” ku Nyarok.

Beribu-ribu mensia ari dalam sereta luar menua Saratok datai ngulu pengerami nya.

Sama bisi ngulu pengerami nya Kaban Kunsil Negeri (ADUN) Kalaka ke lalu nyadi Menteri Muda Pe­mansang Menua Pesisir sereta mega Menteri Muda Pengawa Berumah enggau Pemansang Kandang Nengeri, Abdul Wahab Aziz.