SIBU: Penusah muai uras enggau chara enda beradat ba sesebengkah endur ba mengeri tu baka ke suah ayan ba surat berita begunaka kerejasama ari mensia mayuh kena ngemutarka penusah nya.
Chairman Majlis Perbandaran Sibu (MPS) Datuk Tiong Thai King pechaya, mayuh bagi bala ke diau besemak enggau palan muai uras enggau chara enda beradat nya bisi meda ulah sida sereta nemu sapa ke patut disalahka.
“Tang berapa mayuh sida (bala ke meda) nyanggup diri ngeripot pekara salah tu ngagai sida ke bekaul. Tebal agi ari sida enda bemunyi lalu bisi nya semina nemu nyalahka MPS nengah surat berita tauka ari parti penyakal,” ku iya.
Iya madah munyi nya maya bejaku ba Pengerami Makai Lemai Ninting Taun MPS, malam kemari.
Ku iya nandu jaku iya baru, sida (MPS) nemu pekara nya tang pekara tu ukai salah bala kontraktor.
Tiong madah bisi sekeda nya ngambi jalai muntang muai uras lalu nyadi siti ari peneleba ba sida.
“Tu ulih diperati kitai laban palan endur muai uras nya endang sigi dia belama,” pia ku iya sambil ngarapka mensia mayuh enggau bala media sama besaup mutarka penusah tu.
Baka pemesai menua bukai, iya ti mega Kaban Parlimen Lanang nerangka MPS udah mayuh gawa dikena ngubah mengeri Sibu nyadi sebuah palan ke beresi, manah sereta likun.
“Seraya ke bejalaika tanggung pengawa nyadi pemesai kandang menua, kami (MPS) meri besai terima kasih ngagai semua sida ke udah bebendar besaup enggau kami. Kami mega endang semampai nerima enggau mendingka penemu bala mayuh alai kitai ulih ngemansangka Sibu,”ku iya nambahka baru.
Sama bela datai maya pengawa tu iya nya, Menteri Wang II, Dato Sri Wong Soon Koh, Residen Sibu Sim Kok Kee, Sekretari Hii Chang Kee, Kepala Polis Sibu ACP Shafie Ismail enggau bala ke bukai.