Awakka MB netapka pemutus

0

Iya aja ulih nukuka pemujur tauka enda pengawa ke udah dipejalaika

MIRI: Menteri Kuasa, Teknologi Gadung enggau Ai, Datuk Seri Peter Chin madahka iya udah manggaika ngagai Menteri Besai Datuk Seri Najib Tun Razak ba pekara mutuska penuduk iya ba kabinet perintah besai.

Ku iya, awakka Menteri Besai(MB) beratika pengawa ti udah dikereja iya taja pan iya udah nyadi ketuai ba opis menteri sereta udah nyapai juluk dalam taun siti nyin kemari.

Iya madahka pemujur pengawa ti udah dikereja semua menteri kabinet deka diperatika Najib antara 24 ngagai 26 haribulan Januari tu.

“Opis menteri aku udah nganjung ripot kami, lalu kami udah nyapai juluk ke ditaga tang semua nya deka diperatika menteri besai kitai,” ku iya.

Antara pemujur ti udah dijapai opis nya dalam taun siti nyin kemari nyengkaum ngurangka penanggul ti suah ngachau kuasa karan ba Sabah.

“Tagit kitai deka ngurangka penyampau utai nganchau siku-siku orang ti bekena ka karan dalam setaun ngagai 700 minit, sebedau pengujung taun 2010 tang kitai ulih ngerikodka 687 minit. Sebedau tu,nya lebih ari 2,800 minit,” ku iya.

Chin madahka nya pemujur ti besai dijapai iya lalu kena bulan Mac ba menua Sabah iya deka ngetuka diri ari pengawa nya enti sema iya enda ulih nyapai tagit nya.

Iya madahka, juluk opis nya deka ngulihka 40 buah kompeni nyain sempekat ba ‘Skim Kewangan Teknologi’ (GTFS) taun siti nyin kemari, tang sepenyampau 60 buah kompeni udah ngerejister diri.

Ungkup taun tu, ku iya sida kiruh deka ngemujurka semua projek pemansang ari baruh Program Transformasi Perintah (GTP) enggau Program Transformasi Ekonomi (ETP).

“Taun tu meh nyadi penguji besai ngagai semua pemujur kitai kena bejalaika semua pelin kitai dalam taun tu,” ku iya. — Bernama