Siku bansa Indonesia ditemu mati lemas

0

BINTULU: Siku pengereja pengawa ngemai entuka kompeni kebun bedandang besai sawit ba Sebauh dipelabaka mati lemas ba Sungai Sebungan urung lemai kemari.

Tuai Opis Pengerara Api enggau Penyah Penusah tauka BOMBA sitak Bintulu Asang Linggir madahka, orang ti dipelabaka lemas tu iya nya Firman Gulin, 23, bansa Bugis ari Indonesia bekereja ngemai entuka ba kompeni Sawit Pelita-Genaan, Sebauh.

“Iya dipelabaka lemas urung pukul 5 lemai kemari ba sungai nya lalu raban BOMBA bisi nerima ripot ti madahka iya lenyau sari tu (kemari),”pia ku Asang bejaku lebuh ditalipaun Berita Iban ditu kemari.

Asang madahka, orang ti dipelabaka lemas nya dipadahka mandi kediri ba sungai sebedau lemas.

Berebak enggau penusah nya, raban sida iya udah mujur nganjung raban penyelamat enggau berapa iku pengereja pengawa ngesah penusah tu.

Kelimpah ari nya, Asang mega madahka, raban BOMBA mega udah dianjung ngesah penusah ampuh bah ba Tubau ngambika ulih matau pekara nya ti sepenalam empat kaki ba menua nya.